ڈھڈیال (رپورٹ: منور حسین)
تھانہ ڈھڈیال کی حدود محلہ ابراہیم آباد میں پڑوسی نے موقع کا فائدہ اٹھاتے ہوئے 10 سالہ کمسن بچی کو مبینہ طور پر زیادتی کا نشانہ بنا ڈالا۔
ذرائع کے مطابق واقعے کے وقت متاثرہ بچی گھر میں اکیلی تھی۔ بچی کے والد، جو رکشہ چلا کر گزر بسر کرتے ہیں، اپنی دو بیٹیوں کو کالج چھوڑنے گئے ہوئے تھے جبکہ محنت کش والدہ لوگوں کے گھروں میں کام کے سلسلے میں باہر گئی ہوئی تھیں۔ ملزم پڑوسی ہونے کے ناتے گھر کے تمام معمولات سے واقف تھا اور مبینہ طور پر موقع پا کر گھر میں داخل ہوا۔
افسوسناک واقعے کے بعد 10 سالہ بچی خوف کے باعث بے ہوش ہو گئی اور ہوش میں آنے کے بعد بھی شدید ذہنی صدمے اور خوف کا شکار رہی۔
تھانہ ڈھڈیال پولیس نے متاثرہ بچی کے والد کی مدعیت میں ملزم کے خلاف مقدمہ درج کر لیا ہے، جبکہ متاثرہ بچی کا طبی معائنہ کروا کر میڈیکل رپورٹ فرانزک تجزیے کے لیے متعلقہ حکام کو بھجوا دی گئی ہے۔ پولیس نے کیس کی پیش رفت اور مزید تفتیش کے لیے مقدمہ ایس ایس او آئی یو (SSOIU) صدر سرکل چکوال کو منتقل کر دیا ہے۔
