ہنگورجا (رپورٹ: فیاض محسن سولنگی)
سیٹھارجہ کے رہائشی معذور مزدور رانا عبدالرزاق راجپوت نے میڈیا کے سامنے دہائی دیتے ہوئے الزام عائد کیا ہے کہ ہنگورجا شہر کی مرکزی بازار میں ان کے بیٹے کی سنار کی دکان پر سلیم بروہی اور چند نامعلوم افراد مبینہ طور پر زبردستی داخل ہوئے، انہیں ہراساں کیا اور جان سے مارنے کی دھمکیاں دیں، جس کے باعث ان کے خاندان میں خوف و ہراس پھیل گیا ہے۔
رانا عبدالرزاق راجپوت کے مطابق ان کے بیٹے مختلف شہروں میں صرافی (سنار) کا کاروبار کرتے ہیں اور اسی سے خاندان کا گزر بسر ہوتا ہے۔ انہوں نے بتایا کہ ان کے ایک بیٹے رانا شاہد راجپوت کا سلیم بروہی فریق کے ساتھ لین دین کا معاملہ تھا، تاہم شاہد کافی عرصے سے پراسرار طور پر لاپتہ ہے اور خاندان پہلے ہی شدید تشویش میں مبتلا ہے۔
انہوں نے واضح کیا کہ لاپتہ بیٹے سے ان کا یا ان کے دیگر بیٹوں کا کافی عرصے سے کوئی تعلق یا رابطہ نہیں ہے، اس کے باوجود سلیم بروہی اور اس کے ساتھیوں کی جانب سے ان کے دوسرے بیٹے کاشف راجپوت، معصوم پوتے محمد علی اور دیگر اہلِ خانہ کو قتل کی سنگین دھمکیاں دی جا رہی ہیں۔
معذور مزدور رانا عبدالرزاق راجپوت نے خدشہ ظاہر کیا ہے کہ اگر دھمکیوں کا سلسلہ نہ روکا گیا تو کوئی ناخوشگوار واقعہ پیش آ سکتا ہے۔ انہوں نے ایس ایس پی خیرپور اور ایس ایچ او ہنگورجا سے معاملے کا ہنگامی نوٹس لے کر شفاف تحقیقات کرنے، ملوث افراد کے خلاف قانون کے مطابق کارروائی کرنے اور ان کے خاندان کو فوری تحفظ فراہم کرنے کا مطالبہ کیا ہے۔