سرگودھا (راجہ نورالہی عاطف)
کمشنر سرگودھا ڈویژن حافظ شوکت علی نے شہر کا تفصیلی دورہ کرتے ہوئے مختلف شاہراہوں اور چوکوں پر روڈ سیکٹر کی جاری ترقیاتی سکیموں، سڑکوں کی تعمیر و بحالی اور ’ستھرا پنجاب‘ کی سرگرمیوں کا جائزہ لیا۔
دورے کے دوران کمشنر سرگودھا نے الف چوک، 47 پل، خیام چوک، سٹی روڈ، شاہین چوک، آزادی چوک اور جیل روڈ کا معائنہ کیا۔ انہوں نے جاری ترقیاتی کاموں کے معیار و رفتار، صفائی ستھرائی کے انتظامات اور شہری سہولیات کی بہتری کے حوالے سے متعلقہ افسران کو موقع پر ہی ضروری ہدایات جاری کیں۔
کمشنر نے تاکید کی کہ ترقیاتی منصوبوں میں کوالٹی پر کسی قسم کا سمجھوتہ نہ کیا جائے اور تمام اہم شاہراہوں و چوکوں پر صفائی کا موثر اور مستحکم نظام برقرار رکھا جائے۔ دورے کے موقع پر ایس ای ہائی ویز، ایکسین ہائی ویز، ایم ڈی ستھرا پنجاب ایجنسی اور سی او میونسپل کارپوریشن بھی ان کے ہمراہ تھے۔