مائیکروسافٹ ” اے آئی اور کلاؤڈ“ میں کام کرنیوالوں کی ہوش ربا تنخواہیں! آن لائن ڈیٹا لیک

واشنگٹن:عالمی شہرت یافتہ ٹیکنالوجی جائنٹ ’مائیکروسافٹ‘ (Microsoft) کا اندرونی معاوضوں اور تنخواہوں کا ڈیٹا آن لائن لیک ہو گیا ہے، جس نے ٹیک دنیا میں ہلچل مچا دی ہے۔
معروف خبر رساں ادارے ’بزنس انسائیڈر‘ کی رپورٹ کے مطابق، یہ لیک ہونے والی اسپریڈشیٹ تقریباً 600 ملازمین کے رضاکارانہ اور گمنام ڈیٹا پر مشتمل ہے، جس سے اس بات کا انوکھا انکشاف ہوا ہے کہ یہ کمپنی اپنے ڈویژنز اور مختلف جاب لیولز پر کتنی بھاری تنخواہیں، کیش بونسز اور اسٹاک ایوارڈز دے رہی ہے۔
انٹرنل اسپریڈشیٹ کے افشاء سے معلوم ہوا کہ کلاؤڈ اور آرٹیفیشل انٹیلی جنس (AI) کے شعبوں میں کام کرنے والے ماہرین سب سے زیادہ تنخواہیں اور لاکھوں ڈالر کے اسٹاک ایوارڈز حاصل کر رہے ہیں کمپنی بھر میں بنیادی تنخواہیں لیول 59 کے لیے $111,000(3 کروڑ پاکستانی روپے) سے شروع ہو کر لیول 67 کے لیے $280,000 (7 کروڑ 76 لاکھ پاکستا نی روپے)تک جاتی ہیں، جبکہ اے آئی ڈویژن میں اسٹاک ایوارڈز 14 لاکھ ڈالر تک پہنچ گئے
سپریڈشیٹ میں ملازمین کے ماہانہ اے آئی استعمال (AI Usage) کا انوکھا ڈیٹا بھی سامنے آیا، جہاں ایک ملازم کا ماہانہ اے آئی بل 28,000 ڈالر(78 لاکھ پاکستانی روپے) تک ریکارڈ ہوا
رپورٹس کے مطابق، مائیکروسافٹ میں بنیادی تنخواہیں (Base Salaries) نچلے درجے (لیول 59) پر 111,000 امریکی ڈالر سے شروع ہو کر اعلیٰ عہدوں (لیول 67) پر 280,000 ڈالر تک جاتی ہیں۔ اس کے علاوہ کیش بونسز 110,000 ڈالر(3 کروڑ پاکستانی روپے) تک جبکہ سینئر لیولز پر اسٹاک ایوارڈز 300,000 ڈالر(8 کروڑ 31 لاکھ پاکستانی روپے) تک پہنچ جاتے ہیں۔
یہ لیک ڈیٹا ایسے وقت میں سامنے آیا ہے جب مائیکروسافٹ گوگل، میٹا، اوپن اے آئی اور اینتھروپک جیسی بڑی کمپنیوں کے ساتھ اے آئی اور کلاؤڈ کمپیوٹنگ کے ماہرین کو بھرتی کرنے کے لیے انتہائی سخت مسابقت کا شکار ہے۔ یہی وجہ ہے کہ سب سے بڑی اور حیرت انگیز رقوم مائیکروسافٹ کے کلاؤڈ اور اے آئی (Cloud + AI) آپریشنز میں کام کرنے والے ملازمین کی نظر آ رہی ہیں۔
اس ڈویژن میں کام کرنے والے ملازمین کی بنیادی تنخواہیں 450,000 ڈالر تک جبکہ اسٹاک ایوارڈز حیرت انگیز طور پر 1.4 ملین ڈالر (14 لاکھ ڈالر) تک ریکارڈ کیے گئے ہیں۔ اس کے برعکس، ایکس باکس (Xbox) یا سکیورٹی جیسے دیگر روایتی شعبوں میں تنخواہیں اور مراعات نسبتاً محدود رکھی گئی ہیں۔
اس لیک ہونے والی اسپریڈشیٹ کا ایک اور دلچسپ پہلو یہ ہے کہ اس میں پہلی بار ملازمین کے "ماہانہ اے آئی استعمال” کا کالم بھی شامل تھا۔ تقريباً 350 ملازمین کے فراہم کردہ ڈیٹا کے مطابق، ماہانہ اے آئی پر خرچ ہونے والی median رقم 300 ڈالر تھی، تاہم ایک ملازم نے اپنے ڈویژن (Customer and Partner Solutions) میں ماہانہ اے آئی کا بل 28,000 ڈالر تک ظاہر کیا۔ تجزیہ کاروں کا کہنا ہے کہ اگرچہ یہ کوئی سرکاری یا حتمی ڈیٹا نہیں ہے کیونکہ یہ ملازمین کی جانب سے خود درج کیا گیا ہے، تاہم یہ اس بات کا واضح ثبوت ضرور ہے کہ ٹیکنالوجی کمپنیاں مستقبل کے چیلنجز سے نمٹنے کے لیے اے آئی ٹیلنٹ پر پانی کی طرح پیسہ بہا رہی ہیں۔