لاہور: وزیراعلیٰ پنجاب مریم نواز شریف سے مظفرگڑھ سے تعلق رکھنے والے اراکینِ صوبائی اسمبلی نے ایک اہم ملاقات کی، جس میں ملکی سیاسی صورتحال اور بالخصوص جنوبی پنجاب میں جاری ترقیاتی منصوبوں پر تفصیلی تبادلہ خیال کیا گیا۔
ملاقات میں اراکینِ اسمبلی نے جنوبی پنجاب میں ریکارڈ ترقیاتی پراجیکٹس شروع کرنے پر وزیراعلیٰ کو زبردست خراج تحسین پیش کیا۔ انہوں نے مظفرگڑھ میں الیکٹروبس سروس اور صاف پانی کے منصوبوں کے آغاز پر خصوصی شکریہ ادا کرتے ہوئے کہا کہ وزیراعلیٰ نے ہر بڑے میگا پراجیکٹ کا آغاز جنوبی پنجاب سے کر کے شاندار مثال قائم کی ہے۔
ارکانِ اسمبلی کا کہنا تھا کہ مریم نواز شریف کی بے لوث خدمت نے جنوبی پنجاب کے عوام کے دل جیت لیے ہیں اور خصوصی توجہ کے ذریعے پسماندہ علاقوں کی قسمت بدل دی گئی ہے۔ انہوں نے بتایا کہ فضل مل سے خانپور بگا شیر، ریلوے پھاٹک سے محمود ملز، اور جھنگ موڑ سے ترکی ہسپتال و ریلوے پھاٹک تک چلنے والی الیکٹروبس سروس سے روزانہ ہزاروں شہری مستفید ہو رہے ہیں۔ اس کے علاوہ ’چیف منسٹر لوکل روڈ پروگرام‘ کے تحت ضلع مظفرگڑھ کی رابطہ سڑکوں کی تعمیر و مرمت کا کام بھی تیزی سے جاری ہے۔
مظفرگڑھ کے ارکان صوبائی اسمبلی کی صدر مسلم لیگ ن محمد نواز شریف اور وزیراعلیٰ پنجاب مریم نواز شریف سے ملاقات ۔
ملاقات میں ملکی سیاسی صورتحال اور جنوبی پنجاب میں جاری ترقیاتی منصوبوں پر گفتگو ہوئی۔ ارکان اسمبلی نے مظفرگڑھ میں الیکٹرو بس اور صاف پانی پراجیکٹ سمیت ریکارڈ ترقیاتی… pic.twitter.com/5KZI18GWub
— Zeeshan Malik (@ZeshanMalick) August 19, 2026
ارکان سے گفتگو کرتے ہوئے وزیراعلیٰ مریم نواز شریف نے اس عزم کا اعادہ کیا کہ مسلم لیگ (ن) کھوکھلے نعروں اور جھوٹے دعوؤں کی بجائے عوام کی حقیقی ترقی پر یقین رکھتی ہے۔ انہوں نے کہا کہ جنوبی پنجاب کے عوام کی محرومیوں کو دور کرنا ان کی اولین ترجیح ہے، اور گزشتہ برس سیلاب کے دوران انہوں نے خود جا کر ریسکیو اور ریلیف آپریشنز کی نگرانی کی تھی۔ وزیراعلیٰ نے مزید کہا کہ پسماندہ اور محروم علاقوں کے عوام کے لیے زندگی میں آسانیاں پیدا کرنا ان کے لیے سب سے بڑی خوشی کا باعث ہے۔