راولپنڈی ڈویژن میں بڑے پیمانے پر انتظامی تبدیلیاں، 22 نائب تحصیلدار، 19 گرداور اور اٹک کے 24 پٹواری تبدیل

اٹک:(سید انعام علی کاظمی کی رپورٹ)
پنجاب حکومت نے راولپنڈی ڈویژن میں ریونیو ڈیپارٹمنٹ کے انتظامی ڈھانچے میں بہتری لانے کے لیے بڑے پیمانے پر تبادلے اور تقرریاں کر دی ہیں۔ ذرائع کے مطابق راولپنڈی ڈویژن کے 22 نائب تحصیلدار، 19 گرداور جبکہ ضلع اٹک کے 24 پٹواریوں کو تبدیل کر دیا گیا ہے۔
ذرائع کا کہنا ہے کہ ان تبادلوں کا بنیادی مقصد ریونیو ڈیپارٹمنٹ کی کارکردگی کو مزید بہتر بنانا، انتظامی امور میں بہتری لانا اور عوام کو ریونیو سے متعلقہ معاملات میں بہتر اور بروقت سہولیات فراہم کرنا ہے۔
ذرائع کے مطابق بعض افسران اور اہلکار کافی عرصے سے ایک ہی جگہ پر تعینات تھے، جس کے باعث روٹین پالیسی کے تحت ان کی ٹرانسفر پوسٹنگ کی گئی ہے۔ ذرائع کا کہنا ہے کہ بیشتر تبادلے کسی شکایت یا انکوائری کی بنیاد پر نہیں بلکہ معمول کے انتظامی عمل کا حصہ ہیں۔
تاہم ذرائع کے مطابق فتح جنگ اور حسن ابدال کے ریونیو ڈیپارٹمنٹ سے متعلق بعض شکایات بھی موصول ہوئی تھیں، جن کے پیشِ نظر ان علاقوں میں بھی ریونیو عملے کی تبدیلیاں کی گئی ہیں۔
ذرائع کے مطابق ان اقدامات کا مقصد ریونیو ڈیپارٹمنٹ کے انتظامی نظام کو مزید مؤثر بنانا، کارکردگی بہتر کرنا اور عوام کو بہتر سہولیات کی فراہمی یقینی بنانا ہے۔