نواب شاہ: (نمائندہ بے نقاب نیوز نفیس آرائیں)
صوبائی وزیر برائے وویمن ڈویلپمنٹ سندھ شاہینہ شیر علی نے نواب شاہ میں ذہنی توازن سے محروم بچی سے مبینہ جنسی زیادتی کی کوشش کے واقعے کا سخت نوٹس لیتے ہوئے متعلقہ حکام کو متاثرہ بچی کو ہر ممکن قانونی اور ادارہ جاتی معاونت فراہم کرنے اور ملزمان کو فوری گرفتار کرکے قانون کے کٹہرے میں لانے کی ہدایت جاری کر دی ہے۔ صوبائی وزیر نے انچارج وویمن کمپلینٹ سیل شہید بینظیرآباد زیب النساء سے فوری رابطہ کرکے متاثرہ بچی کو ہر ممکن قانونی مدد فراہم کرنے کی ہدایت کی، جبکہ متعلقہ اداروں پر زور دیا کہ متاثرہ خاندان کو انصاف کی فراہمی کے لیے تمام دستیاب وسائل بروئے کار لائے جائیں۔واضح رہے کہ نواب شاہ کے اے سیکشن تھانے کی حدود تاج کالونی میں ایک غریب خاندان سے تعلق رکھنے والی ذہنی توازن سے محروم بچی کے ساتھ دو نامعلوم ملزمان کی جانب سے مبینہ طور پر جنسی زیادتی کی کوشش کا واقعہ پیش آیا تھا۔ پولیس کے مطابق واقعے کی تحقیقات جاری ہیں، ایک مشتبہ شخص کو حراست میں لیا گیا ہے جبکہ اصل ملزمان کی گرفتاری کے لیے مختلف مقامات پر چھاپے مارے جا رہے ہیں۔