دریائے سندھ میں مسلسل پانی کی سطح بلند، گڈو بیراج پر نچلے درجے کا سیلاب، ہائی الرٹ جاری

سکھر سے ڈویزنل بیوروچیف نصیر احمد لاشاری سے

دریائے سندھ میں پانی کی سطح مسلسل بلند ہونے کے باعث گڈو بیراج پر نچلے درجے کا سیلاب ریکارڈ کیا گیا ہے، جبکہ محکمہ آبپاشی نے حفاظتی بندوں کی کڑی نگرانی کے لیے ہائی الرٹ جاری کر دیا ہے۔محکمہ آبپاشی کے مطابق گڈو بیراج پر پانی کا بالائی بہاؤ 2 لاکھ 82 ہزار 744 کیوسک جبکہ زیریں بہاؤ 2 لاکھ 44 ہزار 919 کیوسک ریکارڈ کیا گیا ہے۔دوسری جانب سکھر اور کوٹری بیراج پر پانی کی آمد و رفت معمول کےمطابق جاری ہے۔ سکھر بیراج پر بالائی بہاؤ 1 لاکھ 70 ہزار 280 کیوسک اور زیریں بہاؤ 1 لاکھ 14 ہزار 300 کیوسک ریکارڈ کیا گیا۔اسی طرح کوٹری بیراج پر بالائی بہاؤ 46 ہزار 565 کیوسک جبکہ زیریں بہاؤ 3 ہزار 950 کیوسک ریکارڈ کیا گیا ہے۔محکمہ آبپاشی کا کہنا ہے کہ دریائی صورتحال پر مسلسل نظر رکھی جا رہی ہے اور کسی بھی ہنگامی صورتحال سے نمٹنے کے لیے متعلقہ عملہ الرٹ ہے۔