ٹوکیو:چین کی معروف اور دنیا کی بڑی الیکٹرک گاڑی ساز کمپنی ’بی وائی ڈی‘ (BYD) نے جاپان کی آٹوموبائل مارکیٹ میں طوفان برپا کرتے ہوئے اپنی نئی اور انتہائی سستی الیکٹرک منی کار ’ریکو‘ (Racco) باضابطہ طور پر لانچ کر دی ہے۔ کمپنی کو امید ہے کہ یہ نئی منی کار جاپانی مارکیٹ کا تختہ الٹ کر فروخت کے نئے ریکارڈ قائم کرے گی۔
جاپان میں کی کار (Kei car) یا ہلکی گاڑیوں کا یہ سیگمنٹ ملک کی کل آٹو موبائل سیلز کا تقریباً ایک تہائی یا 40 فیصد حصہ بناتا ہے، جس پر روایتی طور پر مقامی جاپانی برانڈز جیسے کہ ہنڈا، سوزوکی، ٹیوٹا اور نسان کا مکمل راج رہا ہے۔ بی وائی ڈی نے ان کی گھریلو مارکیٹ میں دگنے جوش سے دھاوا بول دیا ہے۔
قیمت اور حکومتی سبسڈی:
بی وائی ڈی کی جانب سے ’ریکو‘ کی بنیادی خوردہ قیمت ٹیکس اور سبسڈی سے پہلے 19 لاکھ 50 ہزار ین (تقریباً 13,100 ڈالر) رکھی گئی ہے۔ ٹیکس اور حکومتی سبسڈی کے بعد صارفین کو یہ انٹری لیول گاڑی 20 لاکھ ین سے کم میں دستیاب ہوگی، جو کہ تجزیہ کاروں کے نزدیک جاپانی خریداروں کو اپنی طرف کھینچنے کے لیے ایک جادوئی حد ہے۔
اگرچہ اس کی قیمت جاپان کی سب سے زیادہ فروخت ہونے والی الیکٹرک منی کار ’نسان سکورا (Nissan Sakura) سے کم ہے، تاہم کم سبسڈی ملنے کی وجہ سے نسان سکورا اب بھی خریداروں کے لیے قیمت کے لحاظ سے تھوڑی سستی پڑتی ہے۔ اس کے باوجود بی وائی ڈی کا مقصد فوری منافع کمانے کے بجائے اس ’کے کار‘ (Kei Car) کے ذریعے جاپان میں اپنے برانڈ کی دھاک بٹھانا ہے۔ کمپنی نے سال 2026 کے آخر تک ’ریکو‘ کی 10,000 یونٹس فروخت کرنے کا ہدف مقرر کیا ہے۔ یاد رہے کہ سنہ 2023 کے آغاز سے لے کر 2025 کے آخر تک بی وائی ڈی جاپان میں مجموعی طور پر صرف 7,400 کے قریب گاڑیاں فروخت کر پائی تھی۔
شاندار خصوصیات اور ڈرائیونگ رینج:
بی وائی ڈی ’ریکو‘ تین مختلف ورژن (انٹری لیول 200، اور ہائر سپیک 300 پلس اور 300 پریمیم) میں پیش کی گئی ہے۔
بیٹری اور رینج: اس کے اعلیٰ ماڈلز میں 35.84 کلو واٹ آور (kWh) کی لیتھئیم آئرن فاسفیٹ (LFP) بیٹری نصب ہے، جو سنگل چارج پر 320 کلومیٹر تک کا شاندار سفر طے کرتی ہے۔ یہ سنگ میل عبور کرنے والی جاپان کی پہلی ’کی ای وی‘ (Kei EV) بن گئی ہے۔ (جبکہ نسان سکورا کی رینج صرف 180 کلومیٹر ہے۔)
ڈیزائن اور سائز: یہ گاڑی جاپانی خریداروں کی پسند کے مطابق 3,395 ملی میٹر لمبی، 1,475 ملی میٹر چوڑی اور 1,800 ملی میٹر اونچی ہے، جو جاپان کی تنگ گلیوں اور دیہی سڑکوں کے لیے بہترین ہے۔ یہ پہلی جاپانی کے ای وی بھی ہے جس میں پاور سلائیڈنگ دروازے دیے گئے ہیں جو کک سینسر سے کھلتے ہیں۔
BYD’s new K-Car RACCO built for Japan amazes famous Japanese auto reviewer Mitsuhiro Kunisawa with its features. pic.twitter.com/xXwl5p0Ere
— K.L (@kinglinzhuhui) July 27, 2026
دیگر سہولیات: گاڑی میں 47 کلو واٹ موٹر، 10.1 انچ کا سینٹر اسکرین ڈسپلے، لیول ٹو ڈرائیور اسسٹنس، وی ٹو ایل (V2L) پاور آؤٹ پٹ، ہیٹڈ سیٹس، این ایف سی فون کی اور پچھلی سیٹیں تہہ کرنے پر 1,372 لیٹر تک کا شاندار کارگو اسپیس موجود ہے۔
نئی مارکیٹنگ حکمت عملی:
جاپان کے دیہی علاقوں اور کم آبادی والے شہروں تک رسائی حاصل کرنے کے لیے جہاں منی ای ویز کی مانگ سب سے زیادہ ہے، بی وائی ڈی نے چھوٹے شورومز اور منی ڈیلرشپس قائم کرنے کا بھی اعلان کیا ہے جہاں صرف ایک یا دو ماڈلز کی نمائش کی جائے گی۔ اب دیکھنا یہ ہے کہ چینی کمپنی کی یہ حکمت عملی جاپانی آٹوموبائل کے قلعے میں کتنی بڑی سیندھ لگاتی ہے