بلوچستان رحمت اللہ بلوچ بیوروچیف بے نقاب نیوز نیٹورک)
صفائی کی ابتر صورتحال، ذمہ دار حکام خاموش تماشائی بن گئے مستونگ شہر میں صفائی کی صورتحال دن بدن خراب ہوتی جا رہی ہے جبکہ متعلقہ حکام کی عدم توجہی کے باعث شہری شدید مشکلات کا شکار ہیں۔ پرانا پڑی روڈ پر کئی دن گزرنے کے باوجود صفائی نہ ہونے سے جگہ جگہ کچرے کے ڈھیر جمع ہو چکے ہیں، جس سے علاقے میں تعفن پھیل رہا ہے اور مختلف بیماریوں کے خدشات بڑھ گئے ہیں۔علاقہ مکینوں کا کہنا ہے کہ بارہا شکایات کے باوجود صفائی کا کوئی مؤثر انتظام نہیں کیا جا رہا، جبکہ ذمہ دار ادارے اپنی ذمہ داریاں ادا کرنے میں ناکام نظر آ رہے ہیں۔ شہریوں نے افسوس کا اظہار کرتے ہوئے کہا کہ ایک طرف صفائی مہمات کے دعوے کیے جاتے ہیں جبکہ دوسری جانب شہر کی اہم سڑکیں اور گلیاں کچرے کے ڈھیروں کا منظر پیش کر رہی ہیں۔عوامی حلقوں نے ڈپٹی کمشنر مستونگ، میونسپل کمیٹی اور متعلقہ حکام سے مطالبہ کیا ہے کہ پرانا پڑی روڈ سمیت شہر بھر میں فوری صفائی کرائی جائے اور صفائی کے نظام کو مؤثر بنانے کے لیے ہنگامی اقدامات اٹھائے جائیں تاکہ شہریوں کو صاف ستھرا ماحول فراہم کیا جا سکے۔