جیکب آباد رپورٹ مجیب کھوسو
جیکب آباد سے تعلق رکھنے والے ایک ہی خاندان کے تین افراد کو ضلع نصیرآباد کے شہر ڈیرا مراد جمالی میں مبینہ طور پر قتل کیے جانے کا افسوسناک واقعہ پیش آیا ہے۔ ابتدائی اطلاعات کے مطابق واقعہ گھریلو تنازع اور خاندانی اختلافات کا نتیجہ بتایا جا رہا ہے۔ذرائع کے مطابق مبینہ ملزم اسرار ہجوانی جمالی پر اپنی بیوی کونج، ساس مدیہہ اور سسر غلام حسین کو قتل کرنے کا الزام عائد کیا گیا ہے۔ واقعے کے بعد علاقے میں خوف و ہراس پھیل گیا جبکہ پولیس نے واقعے کی تحقیقات شروع کر دی ہیں۔ورثاء کے مطابق محرم الحرام کے دوران نیٹ ورک سروسز کی بندش کے باعث انہیں واقعے کی اطلاع تاخیر سے ملی، جس کے باعث اہل خانہ رات گئے ڈیرا مراد جمالی پہنچ سکے۔ بعد ازاں تینوں افراد کی لاشیں آبائی شہر جیکب آباد منتقل کر دی گئیں، جہاں کہرام مچ گیا اور اہل خانہ غم سے نڈھال ہو گئے۔متاثرہ خاندان کے ورثاء نے مطالبہ کیا ہے کہ واقعے کی مکمل اور شفاف تحقیقات کر کے ذمہ دار ملزم کو فوری طور پر گرفتار کیا جائے اور اسے قانون کے مطابق سخت سزا دی جائے۔پولیس ذرائع کے مطابق واقعے کے تمام پہلوؤں کا جائزہ لیا جا رہا ہے اور حتمی حقائق تفتیش مکمل ہونے کے بعد سامنے آئیں گے۔