لندن :برطانیہ میں ممکنہ طور پر پہلی بار ایسا ہوا ہے کہ مصنوعی ذہانت (اے آئی) سے چلنے والی ایک قانونی فرم نے عدالت میں مقدمہ جیت لیا، جس میں ایک اے آئی وکیل نے کیس تیار کرنے میں مدد دی۔
گارفیلڈ اے آئی، جو گذشتہ سال برطانیہ کی پہلی ریگولیٹڈ اے آئی قانونی فرم بنی تھی، نے فری لانس ایچ آر کنسلٹنٹ تمیراس کمال تاقدیر کی مدد کی تاکہ وہ لندن کی وانڈزورتھ کاؤنٹی کورٹ میں تین گھنٹے طویل سماعت کے بعد 7 ہزار پاؤنڈ کی غیر ادا شدہ فیسیں واپس حاصل کر سکیں۔
انڈیپنڈنٹ کی رپورٹ کے مطابق گارفیلڈ اے آئی کے ایک اے آئی وکیل نے گواہوں کے بیانات سے لے کر مقدمے کی تیاری تک تمام معاملات سنبھالے، جبکہ عدالت میں کیس ایک انسانی بیرسٹر نے پیش کیا۔
عدالت میں انسانی بیرسٹر کے طور پر کام کرنے والے ڈومینک لی نے لنکڈ اِن پر ایک پوسٹ میں لکھا:’یہ جو امکانات کھلتے ہیں وہ سِول مقدمات میں انصاف تک رسائی کے لیے بہت بڑے اور پرجوش ہیں، جن پر پہلے شاید کیس کرنا ہی فائدہ مند نہ ہوتا۔‘
انہوں نے کہا: ’گارفیلڈ کی جانب سے تیار کیے گئے مقدمے کے بیانات، گواہوں کے بیانات اور دستاویزات کے بنڈل نے مجھے جرح اور حتمی دلائل کی تیاری کے لیے ایک مضبوط بنیاد فراہم کی، لیکن یہ ایسا کیس نہیں تھا جو صرف کاغذ پر جیتا جا سکتا تھا۔
’میرے تجربے سے یہ ظاہر ہوا کہ اگرچہ اے آئی اب تیاری کا بڑا کام مؤثر طریقے سے اور معمولی لاگت پر کر سکتی ہے، لیکن متنازع مقدمے میں مؤثر وکالت اب بھی عدالت میں ایک انسان ہی کرتا ہے۔‘
گارفیلڈ اے آئی، جو رائل ٹن برج ویلز میں قائم ہے، کو سولیسیٹرز ریگولیشن اتھارٹی کی جانب سے 10 ہزار پاؤنڈ تک کے دعوے دائر کرنے کی اجازت حاصل ہے، تاہم کمپنی کا کہنا ہے کہ عدالت میں زبانی وکالت پر انسانی وکلا ہی ’مکمل طور پر کنٹرول‘ رکھتے ہیں۔
مدعی تمیراس تاقدیر نے کہا کہ اے آئی وکیل کے استعمال سے مقدمہ لڑنے کی لاگت، ذہنی دباؤ اور وقت میں نمایاں کمی آئی۔
انہوں نے کہا: ’مجھے اس کام کے پیسے نہیں ملے تھے جو میں نے کیا تھا، لیکن ایسا محسوس ہوتا تھا کہ انہیں واپس لینے کا عمل بہت زیادہ دباؤ والا، مہنگا اور وقت طلب ہو سکتا ہے۔‘
مدعی کے مطابق: ’گارفیلڈ نے مجھے یہ ممکن بنایا کہ میں دعویٰ دائر کر سکوں اور آگے بڑھتی رہوں۔ جب جوابی دعویٰ دائر کیا گیا تو اس کا مقصد مجھے خوفزدہ کرنا تھا، لیکن مجھے معلوم تھا کہ میرے پاس قابلِ رسائی، کم لاگت اور مؤثر معاونت موجود ہے۔ میں اس نتیجے سے بہت خوش ہوں۔‘
اپریل میں شائع ہونے والے اے آئی ایکسپوژر انڈیکس کے مطابق قانونی پیشے ان شعبوں میں شامل ہیں جو آٹومیشن کے سب سے زیادہ خطرے میں ہیں۔
اگرچہ اس کا لازمی مطلب یہ نہیں کہ وکیلوں کی جگہ لے لی جائے گی، تاہم تجزیے سے ظاہر ہوا کہ اس شعبے کے 100 فیصد پیشے ’ہائی ایکسپوژر‘ کیٹیگری میں آتے ہیں، یعنی اس پیشے کے بنیادی ذہنی کام مصنوعی ذہانت کے ذریعے انجام دیے جا سکتے ہیں۔
