رپورٹ:عاشر علی،اسلام آباد
کراچی میں مبینہ منشیات فروش خاتون انمول عرف “پنکی” کی گرفتاری اس وقت ملک بھر میں خبروں اور سوشل میڈیا کا اہم موضوع بنی ہوئی ہے۔ پولیس کے مطابق ملزمہ کو ایک انٹیلی جنس بیسڈ کارروائی کے دوران گرفتار کیا گیا جہاں سے مبینہ طور پر کوکین، آئس اور دیگر منشیات برآمد کی گئیں، جبکہ تفتیشی اداروں کا دعویٰ ہے کہ وہ ایک منظم نیٹ ورک کے ذریعے شہر کے مختلف علاقوں میں منشیات کی سپلائی میں ملوث تھی۔ کراچی کی مقامی عدالت نے مزید تحقیقات کے لیے ملزمہ کا تین روزہ جسمانی ریمانڈ منظور کر لیا ہے اور پولیس اب اس کے ممکنہ ساتھیوں، مالی معاملات اور رابطوں کی چھان بین کر رہی ہے۔ کیس اس وقت مزید توجہ کا مرکز بن گیا جب عدالت پیشی کی ویڈیوز سوشل میڈیا پر وائرل ہوئیں اور گرفتاری کے طریقۂ کار، ایف آئی آر کی تفصیلات اور بعض انتظامی معاملات پر سوالات اٹھائے گئے۔ دوسری جانب سماجی حلقوں نے اس کیس کو نوجوان نسل میں بڑھتے ہوئے منشیات کے رجحان کے لیے خطرے کی گھنٹی قرار دیتے ہوئے حکومت اور قانون نافذ کرنے والے اداروں سے مؤثر اقدامات کا مطالبہ کیا ہے، جبکہ حکام کا کہنا ہے کہ تحقیقات جاری ہیں اور عوام غیر مصدقہ خبروں اور افواہوں سے گریز کریں۔