اے یو اسمال فائنانس اور وجئے سیلس پر بڑا سائبر حملہ، کروڑوں صارفین کا ڈیٹا خطرے میں

نئی دہلی: بھارت کے معروف مالیاتی ادارے ’اے یو اسمال فائنانس بینک‘ (AU Small Finance Bank) اور مشہور الیکٹرانکس ریٹیل چین ’وجئے سیلس‘ (Vijay Sales) کو ایک بڑے اور خطرناک سائبر حملے کا سامنا کرنا پڑا ہے، جس کی وجہ سے کروڑوں ہندوستانی صارفین کا حساس ڈیٹا لیک ہونے کا خدشہ پیدا ہو گیا ہے۔

 سائبر سیکیورٹی ذرائع کے مطابق، ScarlettGroup نامی ایک معروف   گروپ نے ان اداروں کے ڈیجیٹل سسٹمز اور سیلز فورس سے جڑے تھرڈ پارٹی پلیٹ فارمز میں نقب لگائی ہے۔ ہیکرز نے دعویٰ کیا ہے کہ ان کے پاس کروڑوں صارفین اور ملازمین کا قیمتی ڈیٹا موجود ہے۔

متاثرہ ڈیٹا میں صارفین کے ذاتی ریکارڈز، کے وائی سی (KYC) دستاویزات، آدھار کارڈ، پین (PAN) کارڈ کی معلومات، بینک اسٹیٹمنٹس، گاڑیوں کے قرضوں (Vehicle Loans) کے ریکارڈز، اور اندرونی کارپوریٹ لاگز شامل بتائے جا رہے ہیں۔

 دوسری جانب، اے یو اسمال فائنانس بینک کی جانب سے جاری کردہ ابتدائی بیان میں واضح کیا گیا ہے کہ بینک کا اپنا بنیادی کور بینکنگ سسٹم (Core Banking System) مکمل طور پر محفوظ ہے اور تمام مالیاتی خدمات معمول کے مطابق جاری ہیں۔ تاہم، بینک اور متعلقہ سیکیورٹی ادارے اس ممکنہ ڈیٹا لیک کی گہرائی سے جانچ پڑتال کر رہے ہیں۔

 ماہرینِ سیکیورٹی نے اس بڑے ڈیٹا لیک کے بعد صارفین کو خبردار کیا ہے کہ وہ کسی بھی ممکنہ فشنگ اسکیم، جعلی فون کالز یا مشکوک پیغامات سے ہوشیار رہیں۔ صارفین کو سختی سے ہدایت کی گئی ہے کہ وہ اپنی نجی معلومات، او ٹی پی (OTP)، پن (PIN) یا پاس ورڈ کسی بھی نامعلوم شخص کے ساتھ ہرگز شیئر نہ کریں۔