ٹھٹھہ(رپورٹ: شیراز وریو)
ٹھٹھہ کے قریب کراچی سے کینجھر جھیل سیر کے لیے جانے والی ایک کوسٹر تیز رفتاری کے باعث بائی پاس چوک کے مقام پر الٹ گئی، جس کے نتیجے میں کراچی سے تعلق رکھنے والے کم از کم 20 نوجوان زخمی ہوگئے۔عینی شاہدین کے مطابق حادثہ اس وقت پیش آیا جب نوجوان تفریح کے دوران شور شرابا اور مستیاں کر رہے تھے جبکہ ڈرائیور کو گاڑی تیز چلانے کا کہا گیا۔ تیز رفتاری کے باعث ڈرائیور گاڑی پر قابو نہ رکھ سکا اور کوسٹر بے قابو ہوکر الٹ گئی۔حادثے کے فوری بعد علاقے میں ریسکیو ایمبولینسیں موجود نہ ہونے کے باعث زخمی نوجوان سڑک پر تڑپتے رہے۔ مقامی افراد نے انسانی ہمدردی کی بنیاد پر اپنی مدد آپ کے تحت سوزوکی گاڑیوں کے ذریعے تمام زخمیوں کو سول اسپتال ٹھٹھہ منتقل کیا، جہاں انہیں طبی امداد فراہم کی گئی۔زخمیوں میں اعظم سلیم، اسامہ، امداد، دلاور، وزیر خان، ثنا اللہ خان، رشید، ریحان، یاسین، نعیم، بلاول، امین سمیت دیگر نوجوان شامل ہیں۔مقامی شہریوں نے حادثے کے بعد بروقت ریسکیو سہولیات نہ ہونے پر شدید تشویش کا اظہار کرتے ہوئے مطالبہ کیا ہے کہ کینجھر اور قومی شاہراہ پر ایمرجنسی سروسز کو مثر بنایا جائے تاکہ قیمتی انسانی جانوں کو بروقت بچایا جا سکے۔