سیالکوٹ (سلیم احمد اعوان شیخو)
ضلعی انتظامیہ کے زیر اہتمام "معرکہ حق” کی تاریخی کامیابی کو ایک سال مکمل ہونے پر شہر میں شاندار اور پروقار تقریب کا انعقاد کیا گیا، جس میں وطن سے محبت، قومی یکجہتی اور افواجِ پاکستان سے بھرپور اظہارِ عقیدت دیکھنے میں آیا۔ تقریب کے سلسلے میں پیرس روڈ کو دلکش برقی قمقموں، سبز ہلالی پرچموں اور خوبصورت سجاوٹ سے آراستہ کیا گیا، جبکہ رات کے وقت شاندار آتش بازی نے آسمان کو رنگوں سے بھر دیا اور شرکا کا جوش و خروش دیدنی رہا۔تقریب میں چاروں صوبوں، آزاد کشمیر اور علاقائی ثقافتوں کی نمائندگی کرتے رنگا رنگ ثقافتی رقص، ملی نغموں اور خصوصی پرفارمنسز پیش کی گئیں، جنہیں شہریوں نے بے حد سراہا۔ ملی نغموں کی دھنوں اور ثقافتی مظاہروں نے شرکا میں حب الوطنی کے جذبات کو مزید اجاگر کیا۔تقریب میں صوبائی وزیر محنت و افرادی قوت پنجاب محمد منشا اللہ بٹ، ڈپٹی کمشنر صبا اصغر علی، ڈسٹرکٹ پولیس آفیسر کیپٹن (ر) دوست محمد، اراکین قومی و صوبائی اسمبلی چودھری فیصل اکرام، رانا عارف ہرناہ، بیگم گلناز شجاعت پاشا، نوید اشرف، شکیلہ آرتھر، رانا شمیم احمد خان، اسسٹنٹ کمشنر صفدر شبیر، سی او میونسپل کارپوریشن زبیر وٹو سمیت دیگر معزز شخصیات اور شہریوں کی بڑی تعداد نے شرکت کی۔۔تقریب کے دوران شہر کی فضا "اللہ اکبر”، "پاکستان زندہ باد” اور "پاک فوج پائندہ باد” کے فلک شگاف نعروں سے گونجتی رہی، جبکہ شرکا نے قومی پرچم لہرا کر اپنی والہانہ محبت کا اظہار کیا۔ تقریب کے اختتام پر پاکستان کی سلامتی، ترقی اور خوشحالی کیلئے خصوصی دعائیں بھی کی گئیں۔