تحریر:اسدمرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
کبھی کبھی ایک فیصلہ پورے نظام کی پرتیں کھول دیتا ہے اور کبھی ایک شخصیت پورے کھیل کا رخ بدل دیتی ہے۔ آزاد جموں و کشمیر پولیس میں حالیہ ہلچل بھی کچھ ایسی ہی کہانی سنا رہی ہے، جہاں بظاہر یہ ایک انتظامی تنازع دکھائی دیتا ہے، مگر حقیقت میں یہ اختیار، مفاد اور اصلاح کے درمیان کھینچی گئی ایک واضح لکیر ہے۔ آئی جی آزاد کشمیر کیپٹن (ر) لیاقت ملک نے جیسے ہی ذمہ داریاں سنبھالیں، ایک ساکت نظام میں حرکت پیدا ہو گئی۔ وہ نظام جو برسوں سے روایتی سستی، اندرونی گروپنگ اور مفادات کے گرد گھوم رہا تھا، اچانک خود کو ایک نئے دباؤ میں محسوس کرنے لگا۔ یہی وہ لمحہ تھا جب کچھ سینئر افسران نے احتجاج کا راستہ اختیار کیا،، کام چھوڑ دیا، اور صرف یہی نہیں بلکہ جونیئر افسران کو بھی اس احتجاج میں شامل کرنے کے لیے دباؤ ڈالنا شروع کر دیا۔ کیا یہ احتجاج واقعی کسی اصولی مؤقف پر تھا یا پھر ایک نئے نظام کی مزاحمت ؟ کیونکہ دوسری جانب جو تصویر سامنے آتی ہے، وہ ایک مختلف کہانی سناتی ہے۔ کیپٹن (ر) لیاقت ملک نے عید کے خر مسرت موقع پر نہ صرف وزیر اعظم سے پولیس ویلفیئر اور شہداء کے خاندانوں کے لیے بھاری فنڈز جاری کروائے، بلکہ پولیس رولز میں اصلاحات اور ماتحت افسران کی ترقیوں کے لیے ایک واضح اور عملی ڈھانچہ بھی ترتیب دیا۔ یہ وہ اقدامات ہیں جن کا مطالبہ برسوں سے کیا جا رہا تھا، مگر عملدرآمد ہمیشہ فائلوں میں دب کر رہ گیا۔
مزید برآں، آئی جی آزاد جموں کشمیر کا ایسا دفتر جو لاہور کے ایک عام پولیس اسٹیشن سے بھی کم حیثیت رکھتا تھا، حکومت سے نئے آئی جی آفس کے لئے 25 کنال اراضی اور فنڈز کا حصول کوئی معمولی کارنامہ نہیں۔ یہ صرف ایک عمارت کا مسئلہ نہیں، بلکہ ادارے کی عزت، خودمختاری اور مستقبل کی بنیاد کا سوال ہے۔ کیپٹن (ر) لیاقت ملک نے یہاں سدا آئی جی تعینات نہیں رہنا لیکن جو افسران آج احتجاج کر رہے ہیں، کیا انہوں نے ماضی میں کبھی ایسے اقدامات کیے کیا انہوں نے کبھی اپنے ماتحتوں کے حقوق، شہداء کے خاندانوں یا ادارے کی بہتری کے لیے اتنی سنجیدگی دکھائی؟ یا پھر یہ سب کچھ صرف اس وقت یاد آتا ہے جب کرسی خطرے میں محسوس ہو؟ یہ لمحہ آزاد کشمیر پولیس کے لیے ایک فیصلہ کن موڑ ہے۔ یا تو یہ نظام اپنی پرانی روش سفارش، دباؤ اور گروپنگ پر قائم رہے گا، یا پھر اصلاح، میرٹ اور فلاح کی نئی راہ اختیار کرے گا۔ یہ جنگ کسی ایک آئی جی کی نہیں، بلکہ ایک سوچ کی ہے۔ ایک طرف وہ لوگ ہیں جو نظام کو جمود میں رکھنا چاہتے ہیں، اور دوسری طرف وہ جو اسے آگے بڑھانا چاہتے ہیں۔