“یہ پاسپورٹ اسرائیل کے علاوہ تمام ممالک کے لیے قابلِ استعمال ہے“ شق برقرار، عوام بھارتی پراپیگنڈا پر دھیان نہ دے

اسلام آباد :پاکستان کے سرکاری ٹی وی پی ٹی وی نے اسرائیل سے متعلق اسلام آباد کے مؤقف میں تبدیلی سے متعلق انڈین میڈیا کے دعوؤں کو گمراہ کن قراردیتے ہوئے کہا ہے کہ پاکستانی پاسپورٹ پر اسرائیل کے لیے ناقابل استعمال کی شق بدستور برقرار ہے۔

یادرہے انڈین میڈیا، خاص طور پر رپبلک ٹی وی، پر یہ دعویٰ کیا گیا تھا کہ پاکستان مغربی ممالک اور اسرائیل کی نگرانی میں 20 ہزار فوجی غزہ بھیجنے کی تیاری کر رہا ہے اور پاکستان نے اپنے پاسپورٹ سے اسرائیل کیلئے“نا قابل استعمال“ کی شق بھی ختم کر دی ہے۔

تاہم پی ٹی وی نیوز نے اپنی خبر میں انڈین میڈیا کے دعویٰ کو گمراہ کن اورمضحکہ خیز قرار دیا ہے۔ خبر میں کہا گیا کہ وزارت خارجہ پاکستان کی جانب سے جاری کردہ پریس ریلیز کے مطابق پاسپورٹ کی شق بدستور برقرار ہے، اور اس میں کوئی تبدیلی نہیں کی گئی۔

ڈائریکٹوریٹ جنرل آف امیگریشن اینڈ پاسپورٹس کے مطابق پاکستانی پاسپورٹ پر اب بھی درج ہے کہ یہ پاسپورٹ اسرائیل کے علاوہ تمام ممالک کے لیے قابلِ استعمال ہے۔
پاکستان کے سرکاری میڈیا کے مطابق انڈین چینل کا پروپیگنڈا بے نقاب کرتے ہوئے وزارت اطلاعات و نشریات پاکستان نے واضح کیا کہ پاکستان کا اسرائیل سے متعلق مؤقف بالکل واضح اور دو ٹوک ہے پاکستان نے نہ کبھی اسرائیل کو تسلیم کیا نہ ہی کسی قسم کا فوجی تعاون زیرِ غور ہے۔

غزہ میں قیام امن کے لیے 20 نکاتی معاہدے کے مطابق ایک کثیر القومی فورس تعینات کیا جانا بھی شامل ہے۔ پاکستانی حکام کے مطابق ’پاکستان بھی اس فورس کا حصہ بننے کا جائزہ لے رہا ہے۔