پاکستانی اداکارہ ژالے سرحدی نے اپنے کیریئر کے ابتدائی دنوں میں شوبز انڈسٹری میں کاسٹنگ کاؤچ جیسی صورتحال کا سامنا کرنے کا انکشاف کیا ہے۔
ایک حالیہ پوڈکاسٹ میں گفتگو کے دوران ژالے نے بتایا کہ اگرچہ پیشکش بہت جارحانہ نہیں تھی، لیکن ایک معروف ہدایتکار نے انہیں یہ تجویز دی تھی۔
ان کے مطابق، ابتدا میں اس ہدایتکار نے انہیں ایک پروجیکٹ سے یہ کہہ کر مسترد کیا کہ ان کا قد زیادہ ہے، حالانکہ یہ وجہ حقیقت پر مبنی نہیں تھی۔ بعد ازاں اسی شخص نے کہا کہ اگر وہ اپنا پسندیدہ کردار چاہتی ہیں تو انہیں سمجھوتہ کرنا پڑے گا، جیسا کہ دیگر خواتین کرتی ہیں۔
ژالے سرحدی نے بتایا کہ انہوں نے اس تجویز پر سخت ردعمل دیا اور واضح کر دیا کہ وہ صرف اپنی تعلیم کے اخراجات پورے کرنے کے لیے شوبز میں ہیں، اور اگر دوبارہ کسی نے ایسی بات کی تو وہ تھپڑ مار دیں گی۔