ہالی ووڈ اداکار اورلینڈو بلوم نے سابق منگیتر کیٹی پیری اور کینیڈا کے سابق وزیراعظم جسٹن ٹروڈو کے مبینہ تعلقات کی خبروں پر دلچسپ اور مزاحیہ ردِعمل دیا ہے۔
غیر ملکی میڈیا کے مطابق، کیٹی پیری اور جسٹن ٹروڈو کے درمیان تعلقات کی افواہیں اس وقت زور پکڑ گئیں جب اورلینڈو بلوم سے علیحدگی کے چند ہفتوں بعد کیٹی کو کینیڈا میں ٹروڈو کے ساتھ مختلف تقریبات میں دیکھا گیا۔ ان مواقع میں مونٹریال میں ایک ڈنر اور کیٹی کے کنسرٹ میں ٹروڈو کی شرکت شامل تھی۔
اسی دوران ایک غیر ملکی ویب سائٹ "دی انیئن” نے ایک طنزیہ اور فرضی خبر شائع کی، جس میں دعویٰ کیا گیا کہ اورلینڈو بلوم اب جرمنی کی سابق چانسلر انجیلا مرکل کو ڈیٹ کر رہے ہیں۔ اس خبر میں رومانوی شام، سیپیاں، چاکلیٹ کیک اور مرکل کے لطیفوں کا ذکر کیا گیا، ساتھ ہی ایک اے آئی سے تیار کردہ تصویر بھی شامل تھی جس میں دونوں موم بتیوں کی روشنی میں ڈنر کرتے دکھائے گئے۔
اس فرضی خبر پر ردِعمل دیتے ہوئے اورلینڈو بلوم نے سنجیدہ جواب دینے کے بجائے مزاح کا حصہ بنتے ہوئے صرف تین تالیوں والے ایموجیز کمنٹ میں پوسٹ کیے، جس پر مداحوں نے بھی قہقہے لگائے۔