لکھنؤ : سوشل میڈیا پر راتوں رات وائرل ہونے اور کروڑوں ویوز بٹورنے کی دھن میں بھارتی ریاست اتر پردیش کے ایک نوجوان یوگیش کو مصنوعی ذہانت (آرٹیفیشل انٹیلی جنس) کا استعمال اس وقت مہنگا پڑ گیا، جب نوٹوں سے بھرے ٹرک الٹنے کی فرضی ویڈیو دیکھ کر حقیقی پولیس اس کے دروازے پر آن پہنچی۔
تفصیلات کے مطابق، اے آئی کونٹینٹ تخلیق کرنے والے یوگیش نامی نوجوان نے دو روز قبل یہ سوچ کر ایک دلچسپ مگر گمراہ کن ویڈیو تیار کی کہ اگر وہ کرنسی نوٹوں سے لدے ایک ٹرک کے الٹنے اور سڑک پر بکھرتے پیسوں کے مناظر دکھائے گا تو انسٹاگرام پر اس کی ویڈیو باآسانی 100 ملین (10 کروڑ) سے زائد ویوز حاصل کر لے گی۔
تاہم، ویوز کے چکر میں نوجوان کا یہ داؤ الٹا پڑ گیا۔ سوشل میڈیا پر اتنی بڑی مقدار میں نقدی کے بکھرنے کی ویڈیو وائرل ہوتے ہی مقامی پولیس حرکت میں آ گئی اور فوری کارروائی کرتے ہوئے یوگیش کو حراست میں لے لیا۔ پولیس حکام نے نوجوان سے سخت تفتیش شروع کر دی کہ آخر یہ ٹرک کس کا ہے اور اتنی خطیر رقم کہاں سے آئی؟
پولیس کی تفتیش کے دوران جب اصل حقیقت کھلی اور معلوم ہوا کہ یہ سارا منظر محض اے آئی ٹیکنالوجی کا کمال ہے اور حقیقت میں کوئی ٹرک یا نقدی موجود نہیں، تو پولیس نے نوجوان کو تنبیہ کرتے ہوئے موقع پر ہی رہا کر دیا۔
سوشل میڈیا اور سائبر ماہرین نے اس دلچسپ مگر سبق آموز واقعے کے بعد صارفین کو خبردار کیا ہے کہ تفریح یا ویوز کے حصول کے لیے مصنوعی ذہانت کے ذریعے ایسی غیر حقیقی اور گمراہ کن ویڈیوز بنانے سے گریز کیا جائے، کیونکہ عوامی سطح پر خوف و ہراس یا غلط فہمی پھیلانے والا مواد تخلیق کرنے پر قانون نافذ کرنے والے اداروں کی جانب سے سخت قانونی نتائج کا سامنا کرنا پڑ سکتا ہے۔
‘اے آئی’ کا چکمہ؟ نوٹوں سے بھرا ٹرک الٹانے کی فرضی ویڈیو بنانا مہنگا پڑ گیا، پولیس نے اصلی ہتھکڑی دکھا دی!


