محبت ہو توایسی، اٹلی کی دوشیزہ جہلم کے نوجوان سے شادی کیلئے کھنچی چلی آئی

محبت کی سرحدیں پار کرنے کا ایک اور انوکھا واقعہ سامنے آیا ہے جہاں اٹلی سے تعلق رکھنے والی جیسمین نامی لڑکی اسلام قبول کرنے کے بعد ایک پاکستانی نوجوان سے شادی کی غرض سے باقاعدہ طور پر جہلم پہنچ گئی ہے۔
تفصیلات کے مطابق اطالوی لڑکی جیسمین اور جہلم کے مقامی رہائشی پاکستانی نوجوان حیدر کے درمیان دوستی کا آغاز سوشل میڈیا کے ایک پلیٹ فارم کے ذریعے ہوا تھا، جو دیکھتے ہی دیکھتے گہرے پیار اور محبت میں تبدیل ہو گئی۔ محبت کے اس رشتے کو ہمیشہ کے لیے جوڑنے کے لیے اطالوی لڑکی نے حیدر سے شادی کرنے کا حتمی فیصلہ کیا۔
فیصلے پر عمل کرتے ہوئے جیسمین نے اپنی مرضی اور رضا مندی سے اسلام قبول کیا اور پاکستان کا سفر اختیار کرتے ہوئے جہلم پہنچ گئی۔ اطلاعات کے مطابق شادی کے تمام قانونی مراحل، دستاویزات اور ضابطے کی کارروائی مکمل کرنے کے لیے یہ جوڑا ڈپٹی کمشنر آفس جہلم بھی پہنچا۔
واضح رہے کہ سوشل میڈیا کی یہ پریت اس لحاظ سے بھی انوکھی ہے کہ پاکستانی نوجوان حیدر جہلم کے ایک نجی پراپرٹی آفس میں بطورِ آفس بوائے کام کرتا ہے، اور اس جوڑے کا یہ انوکھا ملاپ اب پورے علاقے میں موضوعِ بحث بنا ہوا ہے۔