سیالکوٹ (بیورو رپورٹ — سلیم احمد اعوان شیخو)
ڈپٹی کمشنر سیالکوٹ محمد اویس مشتاق نے کہا ہے کہ حکیم الامت ڈاکٹر علامہ محمد اقبال رحمۃ اللّٰہ علیہ کی بدولت آج قوم آزادی کا سانس لے رہی ہے جبکہ ضرورت اس امر کی ہے کہ ان کی شاعری سے بھرپور استفادہ حاصل کیا جائے اور ان کے افکار اور تعلیمات پر عمل پیرا ہو کر دنیاوی و اخروی کامیابی کو یقینی بنایا جائے۔ان خیالات کا اظہار انہوں نے یوم اقبال کے موقع پر علامہ محمد اقبال رحمۃ اللہ کی جائے پیدائش اقبال منزل میں سالگرہ کا کیک کاٹنے کے بعد میڈیا کے نمائندگان سے گفتگو کرتے ہوئے کیا۔اویس مشتاق نے بتایا کہ محکمہ آثار قدیمہ پنجاب کی زیر نگرانی اقبال منزل کی مرمت اور بحالی کا کام جاری ہے۔ انہوں نے کہا کہ پرانی عمارت کی بحالی کا کام پیچیدہ اور باریک ہونے کی وجہ سے کام کی رفتار آہستہ ہے، تاہم جب یہ کام مکمل ہو جائے گا تو یہ تاریخی عمارت طویل عرصے تک محفوظ ہو جائے گی۔ انہوں نے مزید کہا کہ اقبال منزل کے بیرونی حصے کی بحالی کا کام مکمل ہو چکا ہے جبکہ اس روڈ پر بھی اربن سہولیات کی جدید انداز میں تکمیل کر دی گئی ہے۔اس موقع پر ایڈیشنل ڈپٹی کمشنر ہیڈ کوارٹر صولت وٹو، ایڈیشنل ڈپٹی کمشنر میونسپل سروسز میاں سرمد حسین، ایڈیشنل ڈپٹی کمشنر سوشل سروسز مزمل الیاس اور اسسٹنٹ ریکروٹنگ سیالکوٹ رانا صفدر شبیر بھی موجود تھے۔