خوشاب (راجہ نورالہی عاطف سے)
ڈسٹرکٹ بار ایسوسی ایشن خوشاب کے سابق جنرل سیکرٹری ملک غلام عباس بگھور ایڈووکیٹ کے ہاں بیٹے کی ولادت کی خوشی میں حیدرآباد ٹاؤن وڑھی چراغ خیل رنگپور بگھور گراؤنڈ میں ایک شاندار اور روایتی کبڈی کا مقابلہ منعقد کیا گیا۔
اس پروقار تقریب میں علاقہ بھر سے معززین، سیاسی و سماجی شخصیات اور شائقینِ کبڈی نے کثیر تعداد میں شرکت کی۔ تقریب کے مہمانِ خصوصی ملک سجاد حیدر گوندل (سابق ممبر پنجاب بار کونسل) تھے۔ اس کے علاوہ ایڈووکیٹ آصف بلال نتھوکہ، معروف سیاسی و سماجی شخصیت ملک غضنفر وڈھل ٹوانہ، سابق ناظم حسن پور ٹوانہ ملک عاطف امیر کرپالکہ، ملک مستقیم جوئیہ، ملک سمیع اللہ پلوآں، ملک صفدر واگھرہ اور دیگر اہم شخصیات نے بھی بطور مہمانِ خصوصی شرکت کی۔
تقریب کے آغاز پر صدر انجمن تاجران ملک مجاہد حسین بگھور نے تمام مہمانوں کا پرتپاک خیرمقدم کیا اور ان کی تشریف آوری پر دلی شکریہ ادا کیا۔ کبڈی کے اس جوش و خروش سے بھرپور مقابلے کو دیکھنے کے لیے مقامی عوام کی بڑی تعداد گراؤنڈ میں موجود تھی، جنہوں نے کھلاڑیوں کی حوصلہ افزائی کی اور اس رنگا رنگ تقریب کو خوب سراہا۔