پشاور:خیبرپختونخوا کے ضلع جنوبی وزیرستان کے علاقے انگوراڈہ میں افغان سرحدی پوسٹوں سے پاکستانی چوکیوں پر بلااشتعال فائرنگ کی گئی، تاہم پاکستان کی سیکیورٹی فورسز کی جوابی اور مؤثر کارروائی پر افغان طالبان اپنی پوسٹیں چھوڑ کر فرار ہوگئے ہیں۔
Following Afghan Taliban cross-border firing, the Pakistan Army launched a robust retaliatory operation, striking multiple enemy positions.
Pakistan’s forces remain vigilant and fully prepared to defend the country’s borders. https://t.co/rI88hH3w6m
— Eagle Eye (@zarrar_11PK) November 1, 2026
افغان سرحدی پوسٹوں سے پاکستانی سرحدی چوکیوں پر فائرنگ کا سلسلہ جاری رہا، جس کے جواب میں پاکستانی سکیورٹی فورسز نے جوابی کارروائی کرتے ہوئے متعدد افغان سرحدی پوسٹوں، مارٹر پوزیشنز اور دفاعی چوکیوں کو نشانہ بنایا۔
جنوبی وزیرستان لوئر کے ڈپٹی کمشنر نے سوشل میڈیا پلیٹ فارم ایکس پر جاری بیان میں کہا کہ پاکستانی فورسز کے مؤثر ردعمل کے بعد افغان طالبان کے اہلکار بعض سرحدی پوسٹیں چھوڑنے پر مجبور ہو گئے۔
بیان کے مطابق پاکستانی فورسز نے سرحدی اشتعال انگیزی کا بھرپور جواب دیا اور علاقے کی صورتحال پر مسلسل نظر رکھی ہوئی ہے۔ حکام کا کہنا ہے کہ تاحال پاکستانی حدود میں کسی جانی نقصان کی اطلاع نہیں ملی۔
ڈپٹی کمشنر کے مطابق سکیورٹی فورسز ہر قسم کی سرحدی جارحیت کا مؤثر جواب دینے کے لیے مکمل طور پر تیار ہیں۔
تاہم، اس معاملے پر افغان حکام کی جانب سے تاحال کوئی باضابطہ ردعمل سامنے نہیں آیا۔واضح رہے کہ اس سے قبل 27 اکتوبر کو خیبرپختونخوا کے ضلع جنوبی وزیرستان کے سرحدی علاقے انگور اڈہ میں افغان طالبان فورسز کی جانب سے فائرنگ اور گولہ باری کا واقعہ پیش آیا تھا۔