سکھر (رپورٹ/ عبد الرحمان راجپوت)
شیعہ علماء کرام کے ایک وفد نے ایس ایس پی سکھر احمد چوہدری (PSP, QPM) سے ایس ایس پی آفس سکھر میں اہم ملاقات کی۔ ملاقات کے دوران شہر میں امن و امان کی مجموعی صورتحال، مذہبی ہم آہنگی کے فروغ، باہمی تعاون اور شہریوں کے جان و مال کے تحفظ سمیت مختلف اہم امور پر تفصیلی تبادلہ خیال کیا گیا۔ اس موقع پر ڈی ایس پی روہڑی فہد ارشاد مغل اور ڈی آئی بی انچارج سعید احمد قاضی بھی موجود تھے۔ملاقات کے دوران وفد نے امن و امان کی صورتحال کو مزید بہتر بنانے، مذہبی ہم آہنگی کو پروان چڑھانے اور عوام کے تحفظ کے حوالے سے اپنی قیمتی تجاویز پیش کیں، جنہیں ایس ایس پی سکھر نے غور سے سنا اور متعلقہ امور پر فوری اور ضروری احکامات جاری کیے۔اس موقع پر گفتگو کرتے ہوئے ایس ایس پی سکھر احمد چوہدری نے کہا کہ سکھر پولیس شہر میں پائیدار امن کے قیام اور تمام مکاتبِ فکر کے درمیان رواداری، بھائی چارے اور ہم آہنگی کو برقرار رکھنے کے لیے بھرپور اور عملی اقدامات کر رہی ہے۔ تمام شہریوں کے جان و مال کا تحفظ اور پرامن ماحول کو یقینی بنانا سکھر پولیس کی اولین ترجیحات میں شامل ہے۔ امن و امان کی فضا کو بہتر رکھنے اور کسی بھی ناخوشگوار واقعے سے بچاؤ کے لیے علماء کرام اور معاشرے کے تمام ذمہ دار افراد کا تعاون انتہائی اہمیت کا حامل ہے۔ پولیس اور علماء کرام کے درمیان مؤثر رابطہ اور باہمی تعاون معاشرے میں امن، استحکام اور بھائی چارے کے فروغ میں کلیدی کردار ادا کرتا ہے۔ملاقات کے اختتام پر اس بات کا پختہ عزم ظاہر کیا گیا کہ شہر میں امن و امان برقرار رکھنے، مذہبی ہم آہنگی کو فروغ دینے اور عوام کے تحفظ کو یقینی بنانے کے لیے باہمی رابطوں اور تعاون کا یہ سلسلہ مزید مؤثر بنایا جائے گا۔