سیالکوٹ (سلیم احمد اعوان شیخو)
ڈپٹی کمشنر و ایڈمنسٹریٹر میونسپل کارپوریشن سیالکوٹ محمد اویس مشتاق نے میونسپل کارپوریشن آفس میں کمرشلائزیشن کیسز کا تفصیلی جائزہ لیا اور شعبہ پلاننگ کے افسران کو تعمیراتی قوانین پر سختی سے عمل درآمد یقینی بنانے کی واضح ہدایات جاری کی ہیں۔اجلاس کے دوران ڈپٹی کمشنر نے دوٹوک الفاظ میں کہا کہ منظور شدہ نقشہ جات کے بغیر کسی بھی قسم کی تعمیر کی ہرگز اجازت نہیں دی جائے گی۔ انہوں نے ہدایت کی کہ کنورژن فیسوں کی بروقت اور جامع وصولی کے لیے مؤثر کارروائی عمل میں لائی جائے، جبکہ منظور شدہ نقشہ جات سے انحراف کی روک تھام کے لیے سخت نگرانی کا نظام تشکیل دیا جائے۔محمد اویس مشتاق نے اس بات پر بھی زور دیا کہ کمرشلائزیشن کے تمام زیر التوا اور نئے کیسز کو مکمل شفافیت کے ساتھ تمام قواعد و ضوابط کے مطابق نمٹایا جائے۔ انہوں نے تعمیراتی سرگرمیوں کی مسلسل مانیٹرنگ کی ہدایت کرتے ہوئے کہا کہ اس اقدام کا مقصد بہتر شہری منصوبہ بندی، قانونی تقاضوں کی پاسداری اور تعمیراتی معیار کو بلند سطح پر برقرار رکھنا ہے۔ڈپٹی کمشنر نے اپنے عزم کا اعادہ کیا کہ ضلع میں شہری ترقی کے عمل کو قانونی ضوابط کے تابع بنانا، تعمیراتی قوانین کی پابندی کرانا اور شہری منصوبہ بندی کے نظام کو مزید مؤثر و فعال بنانا ضلعی انتظامیہ کی اولین ترجیحات میں شامل ہے۔