مورو (رپورٹ: محمد اسلم مغل)
مورو میں گزشتہ رات دیر سے مورو قومی شاہراہ پر درس تھانے کے قریب موٹر سائیکل سوار مسلح افراد نے پنجاب سے کراچی جانے والے ٹرالر کو روک کر ڈرائیور غلام مرتضیٰ پر تشدد کیا اور اس سے 30 ہزار روپے نقد، 2 ٹچ موبائل فون اور دیگر سامان لوٹ کر فرار ہو گئے۔واقعے کے بعد متاثرہ ٹرالر ڈرائیور نے شدید احتجاج کرتے ہوئے درس تھانے کے سامنے قومی شاہراہ کے درمیان ٹرالر کھڑا کر کے روڈ بلاک کر دیا، جس کی وجہ سے قومی شاہراہ پر ٹریفک کی نقل و حرکت مکمل طور پر معطل ہو گئی اور گاڑیوں کی لمبی قطاریں لگ گئیں۔اس موقع پر متاثرہ ڈرائیور غلام مرتضیٰ کا کہنا تھا:”درس تھانے کے قریب قومی شاہراہ پر مجھ سے لوٹ مار ہوئی ہے اور موقع پر پولیس غائب تھی۔ میں پردیسی ڈرائیور ہوں اور مسلح افراد مجھ سے تمام جمع پونجی لوٹ کر لے گئے ہیں۔ مورو کی قومی شاہراہ محفوظ نہیں ہے، جب تک مجھے انصاف نہیں ملے گا احتجاج جاری رہے گا۔”بعد ازاں درس پولیس نے ڈرائیور کو لوٹا گیا سامان و رقم واپس دلانے اور ملزمان کی جلد گرفتاری کی یقین دہانی کروائی، جس کے بعد ڈرائیور نے احتجاج ختم کر کے ٹرالر ہٹا دیا اور روڈ کو ٹریفک کے لیے کھول دیا گیا۔ درس پولیس نے واقعے کی رپورٹ درج کر کے ملزمان کی تلاش شروع کر دی ہے۔