کیلے فورنیا / سلیکن ویلی:دنیا کے مقبول ترین سوشل میڈیا پلیٹ فارم فیس بک پر روایتی تحریری پوسٹس اور تصویروں کا دور اب ختم ہونے کو ہے۔ پیرنٹ کمپنی ‘میٹا’ (Meta) نے فیس بک کے انٹرفیس میں ایک انقلابی تبدیلی کرنے کا فیصلہ کیا ہے، جس کے بعد اس ایپ کا استعمال کرنے کا پورا تجربہ یکسر بدل جائے گا۔ اس نئی تبدیلی کا بنیادی مقصد فیس بک کو براہ راست ‘ٹک ٹاک’ اور ‘یوٹیوب شارٹس’ کے مقابلے میں کھڑا کرنا ہے۔
رپورٹس کے مطابق میٹا نے فیس بک کے ایک نئے ری ڈیزائن انٹرفیس کی آزمائش شروع کر دی ہے، جس میں روایتی ٹیکسٹ اور فوٹو فیڈ کی بجائے ویڈیوز کو مرکزی اہمیت دی جائے گی۔ اس کا مطلب یہ ہے کہ جب صارف اب فیس بک کھولیں گے تو انہیں پرانی نیوز فیڈ کے بجائے ایک مکمل اسکرین والی ویڈیو فیڈ (Full-screen Video Feed) دیکھنے کو ملے گی۔
ذرائع کے مطابق میٹا کی جانب سے اس نئے "ویڈیو فرسٹ” ورژن کی آزمائش کا آغاز سب سے پہلے بھارت میں کیا گیا ہے تاکہ یہ جانچا جا سکے کہ صارفین اس تبدیلی کو کس حد تک پسند کرتے ہیں۔ فی الحال یہ آزمائش محدود صارفین تک محدود رکھی گئی ہے، اور جن صارفین کو یہ نیا انٹرفیس ملا ہے، ان کے پاس یہ سہولت بھی موجود ہے کہ وہ چاہیں تو واپس پرانی روایتی فیڈ پر سوئچ کر سکتے ہیں۔
دلچسپ بات یہ ہے کہ فیس بک کی پرانی اور روایتی فیڈ غائب نہیں ہوگی بلکہ وہ نیوی گیشن بار میں ایک سیکنڈری ٹیب کے طور پر بدستور دستیاب رہے گی۔ صنعت کے ماہرین کا کہنا ہے کہ فل اسکرین ویڈیو کا یہ انداز سب سے پہلے ٹک ٹاک نے متعارف کرایا تھا، اور اب میٹا بھی اپنے سب سے بڑے پلیٹ فارم کو ٹک ٹاک کے رنگ میں رنگنے کی بھرپور کوشش کر رہا ہے۔
اگرچہ تاحال کمپنی کی جانب سے اس نئے ڈیزائن کو عالمی سطح پر باضابطہ طور پر لانچ کرنے کی کوئی حتمی تاریخ سامنے نہیں آئی، تاہم ماہرین کا خیال ہے کہ بھارت میں کامیاب آزمائش کے بعد اسے مرحلہ وار دنیا کے دیگر ممالک میں بھی متعارف کرا دیا جائے گا۔
ٹک ٹاک کو مات دینے کی تیاری: فیس بک کا روایتی انداز ہمیشہ کے لیے تبدیل، اب ایپ کھولتے ہی کیا نیا نظر آئے گا؟
