اسسٹنٹ کمشنر اور پیرا فورس پر بھاری جرمانوں اور بااثر افراد کو رعایت دینے کا الزام؛ بلاامتیاز کارروائی کا مطالبہ
میاں چنوں (بینقاب نیوز رپورٹر: عاصم کمال)
تلمبہ روڈ پر تجاوزات کے خلاف انتظامیہ کی کارروائی کے دوران مبینہ امتیازی سلوک پر دکاندار سراپا احتجاج بن گئے اور ٹی چوک پر دھرنا دے کر ٹریفک معطل کر دی۔
تفصیلات کے مطابق تجاوزات کے خلاف آپریشن کے دوران چند دکانداروں کو مبینہ طور پر 30، 30 ہزار روپے کے بھاری جرمانے عائد کیے گئے۔ متاثرہ دکانداروں نے الزام عائد کیا ہے کہ اسسٹنٹ کمشنر میاں چنوں اور پیرا فورس کی جانب سے تجاوزات کے خلاف کارروائی میں یکساں پالیسی اختیار نہیں کی گئی۔
مظاہرین کا کہنا تھا کہ عام دکانداروں کے خلاف سخت کارروائی کرتے ہوئے بھاری جرمانے کیے گئے، جبکہ بااثر افراد کی دکانوں اور تجاوزات کو مبینہ طور پر نظرانداز کر دیا گیا۔
احتجاج کرنے والے دکانداروں نے اسسٹنٹ کمشنر اور پیرا فورس کے خلاف شدید نعرے بازی کی اور مطالبہ کیا کہ تجاوزات کے خلاف آپریشن بلاامتیاز کیا جائے اور قانون کا اطلاق تمام دکانداروں پر یکساں ہونا چاہیے۔ انہوں نے واضح کیا کہ انتظامیہ کو بلا تفریق کارروائی کرنی چاہیے تاکہ کسی کے ساتھ ناانصافی نہ ہو۔