ٹیکنالوجی کی دنیا میں ہلچل: میٹا نے اے آئی کا دنیا کا پہلا پاکٹ سائز ڈیوائس ’میوز چارم‘ متعارف کرا دیا

    واشنگٹن:مصنوعی ذہانت (AI) کی دوڑ میں ایپل اور اوپن اے آئی کو پیچھے چھوڑتے ہوئے سوشل میڈیا جائنٹ ’میٹا‘ (Meta) نے (Keychain) کے سائز کا ایک نیا ہینڈ ہیلڈ اے آئی ڈیوائس ’میوز چارم‘ (Muse Charm) باضابطہ طور پر متعارف کرا دیا ہے۔
    مارک زکربرگ نے ’میٹا کنیکٹ‘ کی تقریب کے دوران اس انقلابی ڈیوائس کی رونمائی کرتے ہوئے اعلان کیا کہ یہ جدید ترین ٹیکنالوجی رواں سال دسمبر تک صارفین کے لیے خرید کے لیے دستیاب ہوگی۔
    مارک زکربرگ نے تقریب سے خطاب کرتے ہوئے کہا کہ "ہم نے اس چھوٹے سے آلے میں بے شمار جدید ٹیکنالوجی سمو دی ہے، جو صارفین کو اے آئی اسسٹنٹ ’میوز‘ (Muse) سے گفتگو کرنے اور اپنے اردگرد کے ماحول کو دکھانے کا سب سے تیز ترین ذریعہ فراہم کرے گی۔” میٹا نے اس کے ساتھ ہی اے آئی چشموں کے لیے نئی پرائیویسی آپشنز اور آڈیو اونلی گلاسز سمیت کئی دیگر ہارڈ ویئر مصنوعات کا بھی اعلان کیا ہے۔


    میوز چارم اور نئی اے آئی خصوصیات:
    میٹا کی جانب سے متعارف کرائے جانے والے اس نئے کی چین سائز ڈیوائس کا مقصد وائرل ہونے والے اے آئی اسسٹنٹ ’میوز‘ کو عام لوگوں کی جیب تک پہنچانا ہے۔
    اس کے ساتھ ہی میوز کے لیے لائیو ویڈیو چیٹ، اپنی مرضی کی آواز کے اختیارات کے ساتھ حقیقی وقت میں صوتی گفتگو (Real-time voice conversations) اور ہر صارف کے ایجنٹ کے لیے ایک مخصوص ای میل ایڈریس جیسی جدید فیچرز کا بھی اضافہ کیا گیا ہے۔


    میٹا نے وال مارٹ، بیس بائی اور گیپ سمیت کئی بڑے ریٹیل پارٹنرز کا بھی اعلان کیا ہے جہاں یہ مصنوعات دستیاب ہوں گی۔ اس کے علاوہ پرائیویسی کے تحفظ کے لیے کمپنی نے ’پرائیویٹ پروسیسنگ‘ (Private Processing) نامی سسٹم متعارف کرانے کا عزم ظاہر کیا ہے جو کلاؤڈ پر ڈیٹا کی پروسیسنگ کے دوران صارفین کی معلومات کو مکمل طور پر محفوظ رکھے گا۔
    مارک زکربرگ کا کہنا ہے کہ انہیں مکمل یقین ہے کہ ’میوز‘ آنے والے وقت میں دنیا بھر کے اربوں لوگوں کے لیے ایک ایسا ذاتی سپر انٹیلیجنس پلیٹ فارم بن جائے گا جو ان کی زندگيوں کو بہتر بنانے میں مدد دے گا۔

    Related Posts