ملتان :پیٹرولیم لیوی ٹیکس کے خلاف جماعت اسلامی کا سُپر ٹرین لانگ مارچ امیر جماعت اسلامی حافظ نعیم الرحمٰن کی قیادت میں کراچی سے سفر کرتا ہوا ملتان پہنچ گیا ہے۔ جہاں سے یہ مارچ بزریعہ سڑک اسلام آباد کی جانب روانہ ہوگا۔ 27 ستمبر کو دارالحکومت میں جماعت اسلامی، پاکستان تحریکِ انصاف اور کسان اتحاد کے احتجاج کے پیشِ نظر شہر میں سیکیورٹی سخت کردی گئی ہے۔
اسلام آباد انتظامیہ کی جانب سے اسلام آباد کی مختلف اہم شاہراہوں پر کنٹینرز کھڑے کر کے ریڈ زون جانے والے راستوں کو بند کیا جا رہا ہے اور ڈی چوک پر کنٹینرز کی آہنی دیوار قائم کر دی گئی ہے، جبکہ حساس مقامات پر پولیس کی بھاری نفری بھی تعینات کی گئی ہے۔ اس کے ساتھ ہی انتظامیہ نے کسی بھی ہنگامی صورتحال کے پیش نظر شہر کے تمام سرکاری اسپتالوں کو الرٹ رہنے کی ہدایت جاری کی ہے۔
ملتان ریلوے اسٹیشن پر بڑی تعداد میں موجود کارکنوں سے خطاب کرتے ہوئے حافظ نعیم الرحمٰن نے حکومتی پالیسیوں اور مہنگائی پر شدید تنقید کی۔
انہوں نے واضح الفاظ میں کہا کہ ہم حکومت سے کہتے ہیں کہ آپ کے کنٹینرز دھرے کے دھرے رہ جائیں گے۔ ان کا مزید کہنا تھا کہ حکومت کے پاس بس ایک ہی راستہ ہے کہ لیوی بھتہ ختم کردے، اور اگر لوگوں کو ریلیف دیا جاتا ہے تو ہماری کوئی انا کا مسئلہ نہیں ہے۔
کسانوں اور عوام کے مسائل کو اجاگر کرتے ہوئے امیر جماعت اسلامی نے کہا کہ کسان سے بائیس سو روپے من گندم لے کر عوام کو چھ ہزار روپے من فروخت کی جا رہی ہے، جبکہ آٹا مافیا اور شوگر مافیا ان پارٹیوں میں گھسا ہوا ہے جس کے باعث غریب کے لیے آٹا بھی مہنگا ہے اور چینی بھی مہنگی ہے۔
وفاقی انتظامیہ کی جانب سے 27 ستمبر کے ممکنہ احتجاج سے نمٹنے کے لیے ایک جامع سیکیورٹی پلان تشکیل دیا جا رہا ہے۔ ذرائع کے مطابق دارالحکومت میں 25 ہزار سے زائد اضافی افسران اور اہلکار تعینات کرنے کی منصوبہ بندی کی گئی ہے، جس کے تحت پنجاب اور سندھ سے نو، نو ہزار سے زائد پولیس اہلکار اور آزاد کشمیر سے تقریباً چھ ہزار اہلکار اسلام آباد بلائے جائیں گے۔
شہر کے داخلی اور خارجی راستوں کو مکمل طور پر سیل کرنے کے لیے ابتدائی طور پر ایک ہزار سے زائد کنٹینرز مختلف شاہراہوں پر لگائے جائیں گے۔
ذرائع کا یہ بھی بتانا ہے کہ اس دوران 25 سے 30 ہزار اہلکاروں کے کھانے کی فراہمی پر یومیہ تقریباً پچیس لاکھ روپے کے اخراجات کا تخمینہ لگایا گیا ہے۔