ٹوکیو:جاپان میں طاقتور سمندری طوفان ’ڈوزوان‘ (Dozwan) نے تباہی مچانا شروع کر دی ہے، طوفان کی زد میں آکر مختلف واقعات میں 4 افراد ہلاک جبکہ 22 زخمی ہوئے ہیں دارالحکومت ٹوکیو سمیت کئی علاقوں میں ہائی الرٹ جاری کر دیا گیا ہے۔ طوفان کے خطرے کے پیش نظر پیر کے روز 300 سے زائد پروازیں منسوخ کر دی گئیں جبکہ دارالحکومت اور اس سے ملحقہ علاقوں میں 16 لاکھ سے زائد افراد کو محفوظ مقامات پر منتقل ہونے کی ہدایت جاری کی گئی ہے۔
رپورٹس کے مطابق جب طوفان ٹوکیو کے قریب کاتسورا شہر سے گزرا تو اس دوران ہوا کی رفتار 144 کلومیٹر فی گھنٹہ ریکارڈ کی گئی، جس سے نظامِ زندگی مفلوج ہو کر رہ گیا ہے۔ شدید طوفان کے باعث جاپان ایئرلائنز نے 135 اور آل نیپان ایئرویز نے 140 پروازیں منسوخ کی ہیں، جبکہ ٹوکیو کے اطراف میں 9 ہزار سے زائد گھر بجلی سے محروم ہو چکے ہیں۔ محکمہ موسمیات کے مطابق منگل تک ہونے والی بارش ستمبر کی اوسط ماہانہ بارش سے بھی تجاوز کر سکتی ہے، جس سے طوفانی سیلاب اور ریکارڈ توڑ بارش کا خطرہ بڑھ گیا ہے۔
طوفان کے شدید اثرات کھیلوں اور تفریحی تقریبات پر بھی پڑے ہیں ایشین گیمز کے متعدد مقابلے ملتوی کردئیے گئے وسطی جاپان کے آئچی خطے میں جاری ایشیائی کھیلوں کے دوران گھڑ سواری کا مقابلہ طوفان کی وجہ سے منگل تک کے لیے ملتوی کر دیا گیا ہے۔ جبکہ دنیا کے سب سے بڑے ویڈیو گیم ٹریڈ فیئرز میں سے ایک ’ٹوکیو گیم شو‘ کو حفاظتی وجوہات کی بنا پر وقت سے پہلے بند کرنا پڑا، جبکہ چیبا میں آؤٹ ڈور میوزک فیسٹیول اور اہم بیس بال میچ بھی رد کر دیے گئے۔
اسی طرح اقوام متحدہ کی جنرل اسمبلی میں شرکت کے لیے نیویارک روانہ ہونے والی جاپانی وزیراعظم سانے تکائیچی کی پرواز بھی طوفان کی وجہ سے 4 گھنٹے تاخیر کا شکار ہوئی۔
ٹوکیو کے علاوہ چیبا، کاناگاوا اور شیزوؤکا کے علاقوں میں لینڈ سلائیڈ کا انتباہ جاری کیا گیا ہے، جبکہ کاماکورا شہر کی سڑکیں زیر آب آ جانے کی وجہ سے ٹریفک کے لیے مکمل طور پر بند کر دی گئی ہیں۔ انتظامیہ نے شہریوں کو غیر ضروری سفر سے گریز کرنے کی اپیل کی ہے۔
جاپان میں شدید طوفان ’ڈوزوان‘ کا قہر:4 ہلاک 22زخمی 300 سے زائد پروازیں منسوخ، 16 لاکھ افراد کو نقل مکانی کی ہدایت،
