چنئی: چنئی سپر کنگز نے پیر کے روز سابق بھارتی فاسٹ بولر ظہیر خان کو آئندہ سیزن کے لیے اپنا نیا ہیڈ کوچ مقرر کر دیا ہے۔ ظہیر خان نے اسٹیفن فلیمنگ کی جگہ لی ہے، جنہوں نے 18 سیزنز تک ٹیم کی قیادت کی۔ چنئی سپر کنگز نے سوشل میڈیا پلیٹ فارم ایکس (X) پر جاری پیغام میں کہا، "چنئی سپر کنگز کے ہیڈ کوچ کے طور پر ظہیر خان کا خیر مقدم کرتے ہیں۔”
فرنچائز کی جانب سے جاری پریس ریلیز میں ظہیر خان نے کہا، "آئی پی ایل کی تاریخ کی سب سے کامیاب ٹیموں میں سے ایک کا حصہ بننا میرے لیے انتہائی اعزاز کی بات ہے۔ بحیثیت کرکٹر، میں نے میدان میں سی ایس کے (CSK) کا سامنا کیا اور ان میچوں سے بھرپور لطف اٹھایا۔ چیپاک اسٹیڈیم میں ٹیم کے شائقین کی طرف سے پیدا کیا گیا ماحول ان میچوں کو مزید خاص بناتا ہے۔”
انہوں نے مزید کہا، "میں اس باوقار فرنچائز کی تاریخ اور شاندار روایت کا حصہ بننے کے لیے پرعزم اور پرجوش ہوں۔”
48 سالہ ظہیر خان بھارت کی نمائندگی کرتے ہوئے 92 ٹیسٹ، 200 ون ڈے اور 17 ٹی ٹوئنٹی انٹرنیشنل میچز کھیل چکے ہیں۔ انہوں نے 2011 کے عالمی کپ میں بھارت کی تاریخی فتح میں اہم کردار ادا کرتے ہوئے 21 وکٹیں حاصل کی تھیں اور وہ ٹورنامنٹ میں بھارت کے سب سے کامیاب بولر تھے۔
واضح رہے کہ ظہیر خان 2024 کے سیزن میں لکھنؤ سپر جائنٹس کے مینٹور کے طور پر بھی خدمات انجام دے چکے ہیں، جبکہ اسٹیفن فلیمنگ نے گزشتہ سال جولائی میں پانچ بار کی چیمپئن سی ایس کے سے علیحدگی کا اعلان کیا تھا۔