سکھر (رپورٹ: عبد الرحمان راجپوت)
’’ہسپتال محفوظ تو صحت مند و مضبوط پاکستان‘‘ کے وژن کے تحت فخرِ سندھ، ڈائریکٹر سول ڈیفنس سندھ ریاض حسین لغاری اور ڈپٹی کمشنر و کنٹرولر سول ڈیفنس سکھر نادر شہزاد خان کی خصوصی ہدایات پر سول ڈیفنس وارڈن سروس سکھر کی جانب سے ہالار میمن اسپتال کے اسٹاف کے لیے فائر سیفٹی ایس او پیز اور ہنگامی صورتحال میں محفوظ انخلاء کے حوالے سے خصوصی آگاہی پروگرام منعقد کیا گیا۔
اس موقع پر ڈپٹی چیف وارڈن سول ڈیفنس سکھر ڈاکٹر سعید اعوان نے اسپتال کے ڈاکٹرز، پیرامیڈیکل اسٹاف اور دیگر ملازمین کو آگ لگنے کی صورت میں فوری حفاظتی اقدامات، فائر ایکسٹنگوشر کے درست استعمال، فائر الارم سسٹم اور ہنگامی انخلاء کے طریقۂ کار کے بارے میں تفصیلی آگاہی فراہم کی۔
ڈاکٹر سعید اعوان نے خطاب کرتے ہوئے کہا کہ صحت کے مراکز میں فائر سیفٹی کو اولین ترجیح دینا وقت کی اہم ضرورت ہے۔ ہر اسپتال اور طبی مرکز میں مناسب تعداد میں فائر ایکسٹنگوشر، مؤثر الارم سسٹم اور واضح ایمرجنسی ایگزٹ کا انتظام لازمی ہونا چاہیے، جبکہ متعلقہ اسٹاف کو ہنگامی صورتحال میں ان آلات کے استعمال اور محفوظ انخلاء کی عملی تربیت بھی حاصل ہونی چاہیے۔
انہوں نے مزید کہا کہ ڈائریکٹر سول ڈیفنس سندھ ریاض حسین لغاری کی سرپرستی اور رہنمائی میں سول ڈیفنس وارڈن سروس سندھ بالخصوص سکھر میں فائر سیفٹی اور ہنگامی صورتحال سے نمٹنے کے حوالے سے بھرپور عملی کردار ادا کر رہی ہے، جس کے مثبت نتائج سامنے آ رہے ہیں۔ مختلف اداروں کی جانب سے فائر سیفٹی ایس او پیز پر عملدرآمد اس آگاہی مہم کی حوصلہ افزا پیش رفت ہے، جبکہ ہالار میمن اسپتال اس حوالے سے ایک قابلِ ذکر مثال ہے۔
پروگرام میں ہالار میمن اسپتال کی ایڈمنسٹریٹر ڈاکٹر ماحین عقیل اور دیگر ممبران موجود تھے۔ اس کے علاوہ سول ڈیفنس وارڈن سروس سکھر کی جانب سے پی آر او شہاب حسین، انچارج آفیسر ریسکیو لالا عمران میرانی، انچارج آفیسر ایمرجنسی سروسز حسن معاویہ سمیت دیگر سول ڈیفنس وارڈنز نے بھی شرکت کی۔
تقریب کے اختتام پر ہالار میمن جماعت نے سول ڈیفنس کی جانب سے فائر سیفٹی، فرسٹ ایڈ، ریسکیو اور ایمرجنسی رسپانس کے حوالے سے جاری آگاہی سرگرمیوں کو سراہتے ہوئے تمام اداروں میں حفاظتی اقدامات کو مزید مؤثر بنانے کے عزم کا اظہار کیا۔