حساس ادارے کے ملازم کو فائرنگ کر کے زخمی کرنے والے ڈاکوؤں سے چک 508 گ ب میں سی سی ڈی سمندری پولیس کا سامنا
ماموں کانجن (ملک طارق بشیرسے)
گزشتہ شب تھانہ ماموں کانجن کی حدود میں لوٹ مار کے دوران حساس ادارے کے ملازم کو فائر مار کر زخمی کرنے والے مبینہ دو ڈاکو پولیس مقابلے میں ہلاک جبکہ ان کے 4 ساتھی فرار ہو گئے۔ مقابلہ اسی مقام چک نمبر 508 گ ب میں ہوا جہاں ان ڈاکوؤں نے واردات کی تھی۔
تفصیلات کے مطابق گزشتہ ایک ہفتے سے تھانہ ماموں کانجن کی حدود میں ڈاکوؤں نے اپنی سرگرمیاں تیز کر رکھی تھیں۔ دو روز قبل بھی چک 508 گ ب میں ڈاکوؤں کے چار رکنی گروہ نے تین افراد کو لوٹنے کے دوران حساس ادارے کے ملازم کو فائر مار کر زخمی کر دیا تھا۔
سی سی ڈی سرکل سمندری کے مطابق پولیس ٹیم گشت پر تھی کہ ڈاکوؤں کا چھ رکنی گروہ پھر سے واردات کی نیت سے چک 508 گ ب پہنچ آیا، جہاں ان کا سی سی ڈی صدر ڈویژن سمندری حافظ عامر فرمان گجر، اے ایس آئی نعیم شاہ اور اے ایس آئی محمد علیم جھورڑ کی ٹیم سے آمنا سامنا ہو گیا۔
پولیس کے مطابق فائرنگ کے تبادلے میں دو مبینہ ڈکیت شدید زخمی ہو گئے جو ہسپتال منتقل کیے جانے کے دوران زخموں کی تاب نہ لاتے ہوئے دم توڑ گئے۔ ہلاک ہونے والے ڈاکوؤں کی شناخت ظفر اقبال ولد نذر حسین (سکنہ ساہیوال) اور نذیر ولد اللہ دتہ (سکنہ چک نمبر 194 گ ب، تھانہ رجانہ) کے نام سے ہوئی ہے، جو کہ پنجاب کے مختلف تھانوں میں ڈکیتی سمیت سنگین نوعیت کے 40 مقدمات میں ملوث نکلے۔
مبینہ مقابلے کے دوران ملزمان کے چار ساتھی فرار ہونے میں کامیاب ہو گئے۔ پولیس نے فرار ہونے والے ملزمان کی گرفتاری کے لیے علاقے میں سرچ آپریشن شروع کر دیا ہے، جبکہ واقعے کے حوالے سے مزید قانونی کارروائی اور تفتیش جاری ہے۔