وزیراعظم شہباز شریف کی زیر صدارت اجلاس: ڈیفنس فورسز ایکٹ اور نیشنل کمانڈ اتھارٹی ایکٹ میں ترامیم منظور،بلز آج ہی پارلیمنٹ میں پیش ہوں گے

یپلزپارٹی کی جانب سے دونوں ترمیمی بلز کی غیر مشروط حمایت کا فیصلہ، وزارتِ داخلہ اور قانونی ٹیم نے مرکزی قیادت کو بریفنگ دے دی

اسلام آباد:وزیراعظم شہباز شریف کی زیر صدارت منعقدہ وفاقی کابینہ کے اہم اجلاس میں ‘ڈیفنس فورسز ایکٹ 2026ء’ کے مسودے اور ‘نیشنل کمانڈ اتھارٹی ایکٹ 2010ء’ میں ترامیم کی باضابطہ منظوری دے دی گئی ہے۔

حکومتی ذرائع کے مطابق یہ تمام تبدیلیاں ملک میں ہونے والی 27ویں آئینی ترمیم کے تسلسل اور نئے آئینی ڈھانچے سے قانونی امور کو ہم آہنگ کرنے کے لیے کی جا رہی ہیں۔
ذرائع کا کہنا ہے کہ پاکستان پیپلزپارٹی نے بھی ڈیفنس فورسز ایکٹ ترمیمی بل 2026ء اور نیشنل کمانڈ اتھارٹی ایکٹ ترمیمی بل 2026ء کی بھرپور حمایت کرنے کا فیصلہ کیا ہے۔ اس سلسلے میں وزیرِ داخلہ اور حکومت کی خصوصی قانونی ٹیم نے پیپلزپارٹی کی مرکزی قیادت کو تمام امور پر تفصیلی بریفنگ دی ہے۔ طے پایا ہے کہ قواعد کی معطلی کے بعد یہ دونوں بلز آج ہی قومی اسمبلی کے جاری اجلاس میں منظوری کے لیے پیش کیے جائیں گے۔
کابینہ کے اس اجلاس میں ملکی سیاسی و معاشی صورتحال کے ساتھ ساتھ مجموعی امن و امان کے قیام اور اسے مزید بہتر بنانے کے اقدامات کا بھی تفصیلی جائزہ لیا گیا۔ اس کے علاوہ اجلاس کے دوران بانی پی ٹی آئی عمران خان کی صحت سے متعلق حال ہی میں آنے والے عدالتی فیصلے پر بھی کابینہ ارکان کو اعتماد میں لیا گیا۔