چنیوٹ (فرحان بلال سے)
پاکستان، سعودی عرب اور ترکیہ کے مابین دفاعی معاہدے کے خیرمقدم کے سلسلے میں میونسپل کمیٹی چنیوٹ کے سبزہ زار میں پرچم کشائی کی پروقار تقریب منعقد ہوئی، جس میں تینوں برادر اسلامی ممالک کے پرچم لہرائے گئے اور قومی ترانے پیش کیے گئے۔تقریب کے مہمان خصوصی ڈپٹی کمشنر چنیوٹ عائشہ رضوان اور ڈی پی او ڈاکٹر نوید عاطف تھے، جبکہ ضلعی افسران، سی او ایم سی و ضلع کونسل محمد عارف ، محمد فیاض ،سول سوسائٹی کے نمائندگان اور شہریوں کی بڑی تعداد نے شرکت کی۔ تقریب کا آغاز تلاوتِ کلامِ پاک اور نعتِ رسولِ مقبول ﷺ سے ہوا، جس کے بعد پاکستان، سعودی عرب اور ترکیہ کے قومی ترانے پیش کیے گئے اور تینوں ممالک کے پرچم لہرائے گئے۔اس موقع پر ڈپٹی کمشنر عائشہ رضوان اور ڈی پی او ڈاکٹر نوید عاطف نے خطاب کرتے ہوئے کہا کہ پاکستان، سعودی عرب اور ترکیہ کے مابین دفاعی معاہدہ باہمی اعتماد، بھائی چارے اور مشترکہ سلامتی کے عزم کا مظہر ہے۔ تینوں برادر اسلامی ممالک کے درمیان مضبوط دفاعی تعاون عالم اسلام کے اتحاد اور خطے میں امن و استحکام کے لیے اہم پیش رفت ہے۔انہوں نے کہا کہ پاکستان ہمیشہ مسلم ممالک کے اتحاد، باہمی تعاون اور اجتماعی سلامتی کا علمبردار رہا ہے۔ پاکستان، سعودی عرب اور ترکیہ کے درمیان تاریخی، مذہبی اور برادرانہ تعلقات انتہائی اہمیت کے حامل ہیں، جبکہ دفاعی تعاون کے فروغ سے تینوں ممالک کے باہمی تعلقات مزید مستحکم ہوں گے اور مشترکہ چیلنجز سے نمٹنے میں مدد ملے گی۔تقریب کے دوران تینوں ممالک کے پرچم لہرا کر برادر ممالک کے ساتھ یکجہتی کا اظہار کیا گیا اور دفاعی معاہدے کو عالم اسلام کے اتحاد، باہمی تعاون اور اجتماعی سلامتی کے لیے خوش آئند قرار دیا گیا۔ تقریب کے اختتام پر پاکستان کی ترقی، خوشحالی، سلامتی اور استحکام کے لیے خصوصی دعا بھی کی گئی۔