سکھر ( بیورو رپورٹ / عبد الرحمان راجپوت )
سکھر کے کمبو ہال میں راجپوت اتحاد برادری پاکستان کی باوقار افتتاحی تقریب منعقد ہوئی، جہاں تنظیم کی باقاعدہ بنیاد رکھی گئی۔ تقریب میں سکھر سمیت سندھ کے مختلف علاقوں سے تعلق رکھنے والے راجپوت برادری کے معززین، سماجی شخصیات، نوجوانوں اور معزز مہمانوں نے بڑی تعداد میں شرکت کی۔تقریب کے دوران تنظیم کے اغراض و مقاصد پر روشنی ڈالتے ہوئے مقررین نے کہا کہ راجپوت اتحاد برادری پاکستان کا مقصد برادری میں اتحاد، بھائی چارے، تعلیم کے فروغ، نوجوانوں کی رہنمائی، فلاحی سرگرمیوں اور سماجی خدمت کے جذبے کو مضبوط کرنا ہے تاکہ برادری ایک مضبوط اور منظم پلیٹ فارم پر متحد ہو کر قومی ترقی میں اپنا کردار ادا کر سکے۔اس موقع پر تنظیم کے مختلف عہدوں کے لیے عہدیداران کا اعلان بھی کیا گیا، جنہیں شرکاء نے مبارکباد پیش کرتے ہوئے اپنی مکمل حمایت اور تعاون کا یقین دلایا۔ مقررین نے امید ظاہر کی کہ نومنتخب عہدیداران دیانتداری، اخلاص اور خدمت کے جذبے کے ساتھ تنظیم کو مزید فعال اور مضبوط بنانے میں اہم کردار ادا کریں گے۔تقریب کی ایک نمایاں خصوصیت سندھ کی ثقافتی پہچان اجرک کے تحائف کی تقسیم تھی۔ مہمانوں اور نومنتخب عہدیداران کو اجرک پیش کرکے سندھ کی روایات، ثقافت اور مہمان نوازی کو خراجِ تحسین پیش کیا گیا، جسے شرکاء نے بے حد سراہا۔تقریب کے اختتام پر ملک پاکستان کی سلامتی، سندھ کی ترقی، راجپوت برادری کے اتحاد، خوشحالی اور تنظیم کی کامیابی کے لیے خصوصی دعا کرائی گئی۔ شرکاء نے اس عزم کا اظہار کیا کہ راجپوت اتحاد برادری پاکستان کو ایک مضبوط، منظم اور فعال فلاحی پلیٹ فارم بنایا جائے گا جو برادری کے اجتماعی مفادات اور عوامی خدمت کے لیے بھرپور کردار ادا کرے گا۔