تحریر : اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
پنجاب حکومت کے فلیگ شپ منصوبے "ستھرا پنجاب” میں بھرتیوں کے نام پر ایک ایسا ہولناک اسکینڈل سامنے آیا ہے جس نے سیکیورٹی اداروں اور حکومتی ایوانوں میں کھلبلی مچا دی ہے۔ ایک طرف ڈگری ہولڈر، باشعور اور پڑھے لکھے نوجوان ایک معمولی نوکری کے لیے بھی "کریکٹر سرٹیفکیٹ” بنوانے کی خاطر دفاتر کے چکر کاٹ رہے ہیں، تو دوسری طرف سنگین ترین جرائم میں ملوث چوروں، ڈاکوؤں، اور خواتین و بچوں سے غیر اخلاقی حرکات کرنے والوں کو بغیر کسی سیکیورٹی کلیئرنس اور کریکٹر سرٹیفکیٹ کے "ستھرا پنجاب” میں دھڑا دھڑ بھرتی کر لیا گیا ہے۔ اس سنگین لاپرواہی کا فائدہ اٹھاتے ہوئے سیکیورٹی اداروں (سی سی ڈی) کے ریڈار سے بچنے کے لیے ان مجرموں نے "ستھرا پنجاب” کو اپنی محفوظ ترین پناہ گاہ بنا لیا ہے۔ حیرت انگیز بات یہ ہے کہ پولیس ناکوں پر عام شہریوں کو روک کر ان کے شناختی کارڈ اور ریکارڈ تو چیک کرتی ہے، لیکن قانون نافذ کرنے والے اداروں کی ناک کے بالکل نیچے یہ خطرناک مجرم سرکاری وردیاں پہن کر اور سرکاری گاڑیوں میں دندناتے پھر رہے ہیں۔ سرکاری پروٹوکول اور وردی کی وجہ سے نہ تو کوئی ان پر شک کرتا ہے اور نہ ہی ان کا شناختی کارڈ چیک کیا جاتا ہے، کیونکہ شناختی کارڈ چیک کرنے کی صورت میں ان کا بھیانک مجرمانہ ریکارڈ فوری سامنے آ سکتا ہے۔ اس حوالے سے پولیس ذرائع کا سنسنی خیز اعتراف سامنے آیا ہے کہ "یہ وہ ہارڈ کور مجرمان ہیں جن کا پورا کریمنل ریکارڈ ہمارے پاس موجود ہے، لیکن چونکہ اب یہ سرکاری چھتری تلے آ چکے ہیں، اس لیے انہیں کوئی ہاتھ ڈالنے کی ہمت نہیں کر پا رہا۔”
”بے نقاب نیوز” کو حاصل ہونے والی مصدقہ معلومات کے مطابق، جنوبی پنجاب اس مجرمانہ نیٹ ورک کا سب سے بڑا گڑھ بن چکا ہے، جہاں صوبائی دارالحکومت لاہور سمیت پنجاب بھر میں ساڑھے تین ہزار سے زائد خطرناک ترین ملزمان "سرکاری وردی” پہن کر پناہ لیے ہوئے ہیں اور عوام کے ٹیکس کے پیسوں سے ماہانہ تنخواہیں بھی وصول کر رہے ہیں۔ پنجاب کے مختلف اضلاع میں بھرتی ہونے والے ان سنگین مجرموں کے چونکا دینے والے اعدادوشمار کے مطابق، صرف لاہور میں 800 ملزمان ستھرا پنجاب میں بھرتی ہوئے، جبکہ دیگر اضلاع میں وہاڑی سے 250، بہاولنگر سے 167، ساہیوال سے 123، قصور سے 111، لودھراں سے 110، خوشاب سے 100، بہاولپور سے 90، فیصل آباد سے 60، گوجرانوالہ سے 36 اور راولپنڈی سے 13 ہارڈ کور مجرم اس منصوبے کا حصہ بن چکے ہیں۔
اس تہلکہ خیز انکشاف کے بعد سیکیورٹی اور انتظامی حلقوں میں شدید تشویش پائی جاتی ہے، جس پر وزیر اعلیٰ پنجاب مریم نواز شریف نے معاملے کی سنگینی کا سخت نوٹس لیتے ہوئے انٹیلی جنس اداروں کو جامع تحقیقات اور تفصیلی رپورٹ فوری پیش کرنے کا حکم دے دیا ہے۔ اس تحقیقات کا بنیادی مقصد یہ معلوم کرنا ہے کہ بھرتیوں کے دوران سیکیورٹی جانچ اور پولیس تصدیق کے عمل کو کس کے اشارے پر پسِ پشت ڈالا گیا، اور اس لاپرواہی کے ذمہ دار انتظامی افسران کا تعین کر کے ان کے خلاف سخت قانونی کارروائی عمل میں لائی جائے۔ اب دیکھنا یہ ہے کہ کیا سی سی ڈی اور اعلیٰ پولیس حکام ان سرکاری وردی پوش مجرموں کو سلاخوں کے پیچھے دھکیلنے میں کامیاب ہوتے ہیں یا یہ مجرم قانون کا مذاق اڑاتے رہیں گے۔
پڑھے لکھے نوکریوں سے محروم، سنگین مقدمات میں ملوث افراد کی بھرتیوں پر وزیراعلیٰ کا تحقیقات کا حکم
