مریم نواز شریف کی پرتگالی سفیر سے ملاقات: تجارت، زراعت اور لائیوسٹاک میں تعاون بڑھانے پر اتفاق

لاہور:وزیراعلیٰ پنجاب مریم نواز شریف سے پرتگال کے سفیر پالو ڈومینگوز نے ملاقات کی، جس میں دوطرفہ تعلقات کو مضبوط بنانے، تجارت، زراعت اور لائیوسٹاک کے شعبوں میں تعاون کو فروغ دینے پر تفصیلی تبادلہ خیال کیا گیا۔
وزیراعلیٰ مریم نواز شریف نے پرتگالی کمپنیوں کو پنجاب میں کاروبار اور سرمایہ کاری کی خصوصی دعوت دی۔ دونوں رہنماؤں نے دوطرفہ کاروباری تعلقات کو نئی بلندیوں تک لے جانے کے لیے "پاکستان-پرتگال بزنس فورم” قائم کرنے پر اتفاق کیا۔ اس کے علاوہ، لاہور اور لزبن کو "سسٹر سٹی” (Sister City) کا درجہ دے کر ثقافتی اور تعلیمی تبادلوں کو فروغ دینے پر بھی بات چیت کی گئی۔
وزیراعلیٰ نے کہا کہ پاکستان اور پرتگال کے درمیان تعلقات میں مزید وسعت کی گنجائش موجود ہے۔ انہوں نے فارماسیوٹیکل، توانائی، آبی وسائل، ہیلتھ اور ڈیجیٹل جدت کے شعبوں میں پرتگال کی مہارت سے استفادہ کرنے کی خواہش ظاہر کی۔ مریم نواز شریف نے پرتگالی فٹ بال سٹار کرسٹیانو رونالڈو کی پاکستان میں مقبولیت کا ذکر کرتے ہوئے کہا کہ کھیلوں اور ثقافتی تبادلوں سے دونوں ممالک کے عوام کو مزید قریب لایا جا سکتا ہے۔
پرتگالی سفیر پالو ڈومینگوز نے پاکستان، خصوصاً لاہور کے پکوانوں اور یہاں کے عوام کی مہمان نوازی کی تعریف کی۔ انہوں نے مشرقِ وسطیٰ میں پائیدار امن و استحکام کے لیے پاکستان کے سفارتی اور تعمیری کردار کو شاندار الفاظ میں سراہا۔ پرتگالی سفیر نے اس عزم کا اظہار کیا کہ وہ پرتگال میں پاکستانی تاجروں کو سرمایہ کاری کے لیے سازگار ماحول فراہم کریں گے۔
پرتگالی سفیر نے وزیراعلیٰ پنجاب کی جانب سے پہلے سرکاری کینسر ہسپتال کے قیام اور صوبے میں صحت کے شعبے میں کیے گئے ریکارڈ اقدامات پر مریم نواز شریف کو خراجِ تحسین پیش کیا۔ ملاقات کے اختتام پر پرتگالی سفیر نے وزیراعلیٰ مریم نواز شریف کو پرتگال کے سرکاری دورے کی دعوت دی۔