ٹھٹھہ پنہوں مہیشوری
گھارو میں بجلی اور گیس کی مسلسل غیر اعلانیہ لوڈشیڈنگ کے خلاف شہریوں نے احتجاج کرتے ہوئے متعلقہ اداروں سے فوری نوٹس لینے کا مطالبہ کیا احتجاج کے بعد کے الیکٹرک نے فالٹ کے باعث ہونے والی غیر اعلانیہ لوڈشیڈنگ پر شہریوں کے تحفظات کو تسلیم کرتے ہوئے جلد از جلد مسئلے کے حل کی یقین دہانی کرائی، جبکہ سوئی سدرن گیس کمپنی نے بھی مقامی عملے کو ہدایت جاری کی ہے کہ شہریوں کی مشکلات میں مزید اضافہ کسی صورت برداشت نہیں کیا جائے گا اور صورتحال بہتر بنانے کے لیے عملی اقدامات کیے جائیں گے تفصیلات کے مطابق پریس کلب گھارو کے صدر سید عمران علی، سندھ ترقی پسند پارٹی کے رہنما عمر ناہیو اور تحریک عزم نوجوان کے بانی حسین لاشاری کی قیادت میں شہریوں نے کے الیکٹرک کمپلین سینٹر گھارو کے سامنے پرامن احتجاج کیا مظاہرین نے کہا کہ مقررہ لوڈشیڈنگ کے علاوہ فالٹ کا جواز پیش کرکے روزانہ 16 سے 18 گھنٹے تک بجلی کی بندش کی جا رہی ہے جس کے باعث شہری شدید مشکلات کا شکار ہیں مظاہرین نے مطالبہ کیا کہ کے الیکٹرک عارضی اقدامات کے بجائے فالٹ کو مستقل بنیادوں پر درست کرے تاکہ شہریوں کو بار بار غیر اعلانیہ لوڈشیڈنگ کا سامنا نہ کرنا پڑے انہوں نے خبردار کیا کہ اگر صورتحال میں فوری بہتری نہ آئی تو احتجاج کا دائرہ مزید وسیع کیا جائے گا اس موقع پر کے الیکٹرک کے مقامی ایریا انچارج نے مظاہرین سے مذاکرات کرتے ہوئے یقین دہانی کرائی کہ فالٹ کی وجہ سے ہونے والی غیر اعلانیہ لوڈشیڈنگ کا جلد خاتمہ کیا جائے گا اور شہریوں کو مزید پریشانی کا سامنا نہیں کرنا پڑے گا دوسری جانب پریس کلب گھارو کے صدر سید عمران علی اور تحریک عزم نوجوان کے بانی حسین لاشاری نے سوئی سدرن گیس کمپنی کے مقامی افسران سے ملاقات کرکے صبح ناشتے کے اوقات میں گیس کی غیر اعلانیہ بندش پر شدید تشویش کا اظہار کیا انہوں نے کہا کہ صبح کے اوقات میں گیس کی عدم فراہمی سے گھریلو صارفین کو شدید مشکلات کا سامنا کرنا پڑ رہا ہے سوئی سدرن گیس کمپنی کے ایریا انچارج تارا چند اور نیاز خاصخیلی نے وفد کو یقین دلایا کہ شہریوں کے تحفظات اور مشکلات سے اعلیٰ حکام کو فوری طور پر آگاہ کیا جائے گا اور گیس کی فراہمی میں بہتری کے لیے ریلیف کی درخواست بھی ارسال کی جائے گی شہریوں نے امید ظاہر کی ہے کہ متعلقہ ادارے اپنی یقین دہانیوں پر عمل کرتے ہوئے بجلی اور گیس کی غیر اعلانیہ لوڈشیڈنگ کا خاتمہ کریں گے تاکہ عوام کو روزمرہ زندگی میں درپیش مشکلات سے نجات مل سکے