دیر بالا(بیورو چیف ریاض ابوالخیل)
انسپکٹر جنرل آف پولیس خیبر پختونخوا کے وژن کے مطابق پولیس فورس کو جدید خطوط پر استوار کرنے اور عوام کو بہتر خدمات کی فراہمی کے سلسلے میں اہم اقدامات جاری ہیں۔ اسی سلسلے میں ریجنل پولیس آفیسر ملاکنڈ سید فدا حسن شاہ کے احکامات کی روشنی میں ڈسٹرکٹ پولیس آفیسر دیر بالا اسلم نواز نے نوتعمیر شدہ پولیس اسٹیشن شاہی کوٹ کا باقاعدہ افتتاح کیا۔افتتاحی تقریب میں ایس ایچ او تھانہ شاہی کوٹ شہاب الدین خان، دیگر پولیس افسران، اہلکاروں اور علاقہ مشران نے شرکت کی۔ تقریب کے آغاز میں ملک و قوم کی سلامتی، پائیدار امن اور پولیس فورس کی مزید کامیابیوں کے لیے خصوصی دعا کی گئی۔اس موقع پر ڈی پی او دیر بالا اسلم نواز نے کہا کہ نوتعمیر شدہ پولیس اسٹیشن کے قیام سے پولیس اہلکاروں کو بہتر دفتری اور رہائشی سہولیات میسر آئیں گی، جس سے ان کی کارکردگی میں مزید بہتری آئے گی۔ انہوں نے کہا کہ جدید سہولیات سے آراستہ پولیس اسٹیشن عوام کے احساس تحفظ کو مضبوط بنانے اور علاقے میں امن و امان کے قیام میں اہم کردار ادا کرے گا۔ڈی پی او دیر بالا نے پولیس اسٹیشن کی عمارت، سکیورٹی انتظامات اور اہلکاروں کی رہائشی سہولیات کا تفصیلی معائنہ کیا۔ انہوں نے افسران و اہلکاروں کو ہدایت کی کہ وہ ہر وقت چوکس رہیں، عوام کے ساتھ خوش اخلاقی اور مؤثر رابطہ برقرار رکھیں اور سکیورٹی اقدامات کو مزید مؤثر بنائیں۔بعد ازاں پولیس اسٹیشن شاہی کوٹ میں ایک کھلی کچہری کا انعقاد بھی کیا گیا، جس میں علاقہ مشران اور عمائدین نے امن و امان، عوامی مسائل اور مقامی سطح پر درپیش چیلنجز کے حوالے سے اپنی آراء، تجاویز اور شکایات پیش کیں۔ ڈی پی او دیر بالا نے شرکاء کے مسائل غور سے سنتے ہوئے ان کے فوری اور مؤثر حل کے لیے متعلقہ افسران کو ضروری ہدایات جاری کیں۔کھلی کچہری کے اختتام پر علاقہ مشران نے دیر بالا پولیس کے ساتھ مکمل تعاون جاری رکھنے کے عزم کا اعادہ کیا۔