بلوچستان رحمت اللہ بلوچ بیوروچیف بے نقاب نیوز نیٹورک)
کوئٹہ الیکٹرک سپلائی کمپنی(کیسکو)نے محرم الحرام کے ایام میں بجلی کی باقاعدہ اور مسلسل فراہمی کے لئے پاور ڈسٹری بیوشن سینٹر (پی ڈی سی) کیسکومیں کنٹرول روم قائم کردیاگیاہے جو چیف انجینئر کی نگرانی میں ایکسئن، ایس ڈی او اور لائن اسٹاف پر مشتمل عملہ 24گھنٹے 3شفٹوں میں نویں اور دسویں محرم الحرام کے دوران بجلی کی مسلسل فراہمی کومانیٹر کرنے اوربجلی کی صورتحال سے متعلق بھی کیسکوچیف کوآگاہ کرتارہے گا۔ نویں اور دسویں محرم الحرام میں کیسکوکے آپریشن سرکلز اورڈویژن کی سطح پربھی کنٹرول روم قائم کردیاگیاہے جس میں سپرنٹنڈنگ انجینئرز،ایکسئنز اور ایس ڈی اوز آپریشنل عملہ کے علاوہ گرڈسسٹم آپریشن (جی ایس او) کے افسران اورعملہ بھی نویں اور دسویں محرم الحرام کے دوران گرڈاسٹیشنز میں اپنی موجودگی کویقینی بنائیں گے۔ کیسکوایمرجنسی کنٹرول سینٹر صوبائی حکومت کے زیرانتظام ایمرجنسی کنٹرول روم اور ضلعی انتظامیہ سے بھی رابطے میں رہے گا۔ کنٹرول سینٹر امام بارگاہوں سے منسلک فیڈروں اورمحرم الحرام کے جلوس والے راستوں میں بجلی منقطع ہونے کی صورت میں یا صارفین کی جانب سے شکایت موصول ہونے پر بجلی کی دوبارہ بحالی کیلئے ہنگامی بنیادوں پر اقدامات کرے گا۔ اسکے علاوہ کسی بھی علاقہ میں تکنیکی خرابی کو دور کرنے اور بجلی کی دوبارہ بحالی کیلئے کیسکوٹیم اور متعلقہ فیڈروں کے سب ڈویژنل افسران (SDO) اپنے عملہ کے ساتھ دفاترمیں موجودرہیں گے تاکہ بجلی سے متعلق کسی بھی ایمرجنسی سے بر وقت نمٹا جا سکے۔
نویں اور دسویں محرم الحرام میں ا مام بارگاہوں اور جلوس کے راستوں سے منسلک 11فیڈرزکولوڈشیڈنگ سے مستثنیٰ قراردے دیاگیاہے جن میں مری آباد، سید آباد، طوغی روڈ، لیاقت بازارایکسپریس،گلستان روڈ، حالی روڈ،کاسی ون، کاسی ٹو اور سٹی، ویسٹرن بائی پاس، ہزارہ ٹاون،انڈسٹریل، کرانی، غازی،خیر بخش مری، نیوجان محمد، اولڈلیاقت بازار،منی مارکیٹ، سٹیلائٹ ٹاون، اے ون سٹی، سرکی روڈ، جبل نور،دوستین،سورج گنج بازار، نواں کلی، شہبازٹاون، بروری روڈ، جناح ٹاون، پی اے ایف سٹی فیڈرزشامل ہیں جن پرنویں اور دسویں محرم تک بجلی کی لوڈشیڈنگ نہیں کی جائے گی۔ اسی طرح کوئٹہ شہرسے باہر صوبہ کے دیگر اضلاع میں بھی مجالس اورعزاداری کے دوران ژوب سٹی،لورالائی کینٹ، ڈیرمرادجمالی سٹی،، صحبت پور سٹی، گنداخہ فضل فقیر، بھاگ سٹی، مچ سٹی،سبی سالم شاہ، ڈھاڈرایکسپریس، خضدارسول کالونی، ڈسٹرکٹ دُکی لورالائی فیڈروں کو بھی شام 7بجے سے صبح5بجے تک بلاتعطل بجلی کی فراہمی جاری رہے گی۔صارفین بجلی بندش سے متعلق انفرادی شکایات کیلئے 24گھنٹے براہ راست کیسکوہیلپ لائن118 کے علاوہ 0819201445 پربھی کال کرکے اپنی شکایات درج کرواسکتے ہیں۔