بلوچستان رحمت اللہ بلوچ بیوروچیف بے نقاب نیوز نیٹورک)
نیشنل پارٹی مستونگ کے ایک وفد نے آج آغا خان پروجیکٹ آفس کا دورہ کیا، جہاں بچوں کی حفاظتی ویکسینیشن سے متعلق امور پر تفصیلی تبادلہ خیال کیا گیا۔ وفد نے ڈسٹرکٹ کوآرڈینیٹر وسیم بلوچ اور تحصیل مانیٹر تکری محمد ایوب لہڑی سے ملاقات کی،
ملاقات میں ڈسٹرکٹ کوآرڈینیٹر وسیم بلوچ اور تحصیل مانیٹر تکری محمد ایوب لہڑی نے وفد کو ویکسینیشن مہم کے حوالے سے بریفنگ دی اور جاری کام سے آگاہ کیا۔
وفد میں نیشنل پارٹی مستونگ کے صدر میر سکندر ملازئی، لیبر فورم مستونگ کے صدر ظفر بلوچ، تحصیل صدر رحمت اللہ بلوچ، لیبر فورم کے نائب صدر نوید لطیف بنگلزئی، تحصیل نائب صدر امداد بلوچ اور نیشنل پارٹی کے ڈپٹی جنرل سیکرٹری عمران بلوچ شامل تھے۔
گفتگو کے دوران بچوں کو لگائے جانے والے حفاظتی ٹیکہ جات اور ویکسینیشن مہم کی پیش رفت پر تفصیلی بات چیت ہوئی۔ متعلقہ حکام نے بتایا کہ مشکل حالات کے باوجود فیلڈ اسٹاف گھر گھر جا کر 15 یونین کونسلز میں بچوں کو ویکسین فراہم کر رہا ہے، جس پر نیشنل پارٹی کے رہنماؤں نے ان کی کاوشوں کو سراہا۔
نیشنل پارٹی کے وفد نے یقین دہانی کرائی کہ جہاں بھی اسٹاف کو کسی مشکل کا سامنا ہوگا، پارٹی ہر ممکن تعاون فراہم کرے گی۔ رہنماؤں کا کہنا تھا کہ نیشنل پارٹی ماضی میں بھی بچوں کی صحت کے حوالے سے پولیو جیسے موذی مرض کے خاتمے کے لیے ہمیشہ سرگرم رہی ہے۔
آخر میں نیشنل پارٹی مستونگ کے صدر میر سکندر ملازئی نے ڈسٹرکٹ کوآرڈینیٹر وسیم بلوچ اور تحصیل مانیٹر تکری محمد ایوب لہڑی سمیت آغا خان پروجیکٹ کے عملے کی خدمات کو سراہتے ہوئے ان کی کوششوں کو قابلِ تحسین قرار دیا۔