کوالا لمپور:ایشیائی ترقیاتی بینک (ایشین ڈویلپمنٹ بینک) نے پاکستان کو 70 کروڑ ڈالر قرض جاری کرنے کی منظوری دے دی ہے جس کا مقصد انشورنس کے شعبے میں اصلاحات اور کوریج کو فروغ دینا ہے۔
تفصیلات کے مطابق ایشیائی ترقیاتی بینک کا کہنا ہے کہ پاکستان کیلئے 70 کروڑ ڈالرز قرض پروگرام کا مقصد خواتین، کسانوں اور کم آمدن والے خاندانوں کو مالیاتی تحفظ کی فراہمی ہے۔ پاکستان میں انشورنس کا حجم جی ڈی ی کا صرف 0.7فیصد بنتا ہے۔
ایشین ڈویلپمنٹ بینک کے مطابق نئی اصلاحات کا مقصد قدرتی آفات اور معاشی دھچکوں سے نمٹنے میں مدد دینا ہے۔ اس کا مقصد انشورنس مارکیٹ کو جدید اور مسابقتی نظام میں بدلنا بھی ہے۔ بینک نے ڈیجیٹل نظام کے ذریعے انشورنس خدمات عام کرنے پر زور دیا۔
بینک کے مطابق اسٹیلائٹ ٹیکنالوجی اور جدید انشورنس ماڈلز متعارف کرانے کا فیصلہ کرلیا گیا ہے۔ خواتین اور بچیوں کیلئے خصوصی انشورنس مصنوعات بھی متعارف کرائی جائیں گی۔ انشورنس پروگرام سے قدرتی آفات کے بعد سرکاری مالی بوجھ کم کرنے میں مدد ملے گی۔
اس کے علاوہ ایشیائی ترقیاتی بینک کا ماننا ہے کہ طویل مدتی بچت کو انفراسٹرکچر اور بانڈ مارکیٹ میں استعمال کیا جاسکے گا، نجی پنشن اسکیمز اور سالانہ پنشن نظام کو فروغ دینے کیلئے بھی اقدامات اٹھائے جائیں گے۔ مستحکم انشورنس نظام ملک کے مالی استحکام کو بہتر بنانے میں مدد دے گا۔
