صوبہ بھر میں طوفانی بارشیں: وزیراعلیٰ مریم نواز کا تمام اداروں کو ہائی الرٹ رہنے کا حکم

لاہور: وزیراعلیٰ پنجاب مریم نواز شریف نے صوبہ بھر میں جاری طوفانی بارشوں کے پیش نظر تمام متعلقہ اداروں کو ‘ہائی الرٹ’ رہنے کا حکم دیتے ہوئے ہدایت کی ہے کہ عوام کی جان و مال کے تحفظ کے لیے کوئی کسر نہ چھوڑی جائے۔
وزیراعلیٰ مریم نواز شریف نے بارش کے پانی کی فوری نکاسی کو یقینی بنانے کے لیے واسا (WASA) کی کارکردگی کی مسلسل نگرانی اور مؤثر مانیٹرنگ کا حکم دیا ہے۔ انہوں نے سختی سے ہدایت کی کہ اربن ایریاز میں پانی کھڑا نہ ہونے دیا جائے اور برساتی نالوں اور ڈرینز کی مسلسل نگرانی کی جائے۔
محکمہ آبپاشی (اریگیشن ڈیپارٹمنٹ) کو ہدایات دیتے ہوئے وزیراعلیٰ نے کہا کہ ٹیمیں مکمل الرٹ رہیں اور نہروں میں پانی کے بہاؤ کی مسلسل مانیٹرنگ کی جائے۔ انہوں نے شہری اور دیہی علاقوں میں تمام مین ہولز پر ڈھکنوں کی موجودگی کو یقینی بنانے کا بھی حکم دیا ہے۔
مریم نواز شریف نے کہا کہ بارشوں کے دوران کسی بھی ناخوشگوار واقعے سے بچاؤ کے لیے کنسٹرکشن سائٹس پر حفاظتی انتظامات کیے جائیں، جبکہ خستہ حال اور تعمیراتی طور پر حساس عمارتوں کی خصوصی نگرانی کی جائے۔ ضلعی انتظامیہ کو ہدایت کی گئی ہے کہ چھت گرنے کے ممکنہ خطرات کے پیش نظر شہریوں کو الرٹس جاری کیے جائیں۔
ٹریفک کی روانی کے حوالے سے وزیراعلیٰ نے کہا کہ اہم شاہراہوں اور مرکزی روڈز پر ٹریفک کی روانی برقرار رکھنے کے لیے خصوصی انتظامات کیے جائیں۔ انہوں نے سیف سٹی اتھارٹی اور سی ٹی او ٹیموں کو مکمل الرٹ رہنے اور عوام کی رہنمائی کے لیے رابطہ برقرار رکھنے کا حکم دیا۔
وزیراعلیٰ مریم نواز شریف نے فیلڈ میں موجود تمام ٹیموں کو مخاطب کرتے ہوئے کہا کہ شہریوں کی جان و مال کے تحفظ کے لیے تمام ادارے متحرک اور مستعد رہیں۔ انہوں نے اس عزم کا اعادہ کیا کہ حکومت بارشوں کے دوران عوام کو درپیش مسائل کے حل کے لیے پوری طرح چوکس ہے۔