مکہ مکرمہ: کرکٹ کی دنیا کے مایہ ناز سابق کپتان اور ‘سوئنگ کے سلطان’ وسیم اکرم کی حج کی ادائیگی کے دوران ایک ویڈیو سوشل میڈیا پر موضوعِ بحث بنی ہوئی ہے، جس میں انہیں منیٰ کے مقام پر رمی (شیطان کو کنکریاں مارنے) کے عمل کے دوران اپنے مخصوص کرکٹ انداز میں دیکھا جا سکتا ہے۔
حج کی سعادت حاصل کرنے کے لیے سعودی عرب میں موجود وسیم اکرم کی یہ ویڈیو انٹرنیٹ پر تیزی سے وائرل ہو رہی ہے۔ ویڈیو میں دیکھا جا سکتا ہے کہ وسیم اکرم رمی کے دوران کنکریاں مارتے ہوئے اپنے روایتی بولنگ ایکشن کی جھلک پیش کر رہے ہیں، جس کے بعد وہ اپنے مخصوص انداز میں جشن مناتے ہوئے بھی نظر آئے۔
سوشل میڈیا صارفین کی جانب سے اس ویڈیو پر ملے جلے تاثرات کا اظہار کیا جا رہا ہے۔ بہت سے مداحوں نے وسیم اکرم کے اس پرجوش انداز کو سراہا اور ان کے لیے نیک خواہشات کا اظہار کیا ہے، جبکہ کچھ لوگوں نے اسے ان کی کرکٹ سے گہری وابستگی اور فطری انداز قرار دیا ہے۔
واضح رہے کہ سوئنگ کے سلطان ان دنوں اپنے روحانی سفر میں مصروف ہیں اور سوشل میڈیا کے ذریعے اپنے مداحوں کو حج کے مناسک کی ادائیگی کے حوالے سے اپ ڈیٹس فراہم کرتے رہتے ہیں۔ وسیم اکرم، جو اپنی باؤلنگ سے دنیا بھر کے بلے بازوں کو پریشان کرتے رہے ہیں، اب حج کے اس مقدس فریضے کی ادائیگی کے دوران بھی اپنے مداحوں کی توجہ کا مرکز بنے ہوئے ہیں۔