جیکب آباد رپورٹ مجیب کھوسو
جیکب آباد میں سابق نگران وزیراعظم محمد میاں سومرو، میر اصغر خان پہنور اور دیگر رہنماؤں کی قیادت میں “معرکہ حق ریلی” نکالی گئی، جس میں شہریوں، سیاسی و سماجی کارکنوں اور مختلف مکاتب فکر سے تعلق رکھنے والے افراد نے بڑی تعداد میں شرکت کی۔ ریلی شہید اللہ بخش پارک سے برآمد ہوئی جو شہر کے مختلف راستوں سے ہوتی ہوئی ڈی سی چوک پہنچی جہاں اختتامی اجتماع منعقد کیا گیا ریلی کے شرکاء کے ہاتھوں میں قومی پرچم، بینرز اور پلے کارڈز تھے جبکہ شرکاء کی جانب سے پاک فوج، قومی یکجہتی اور ملک کی سلامتی کے حق میں زبردست نعرے بازی کی گئی۔ اس موقع پر مقررین نے کہا کہ “معرکہ حق” قومی اتحاد، یکجہتی اور دفاع وطن کے جذبے کی علامت ہے اور پوری قوم اپنی بہادر افواج کے شانہ بشانہ کھڑی ہے۔سابق نگران وزیراعظم محمد میاں سومرو نے خطاب کرتے ہوئے کہا کہ پاکستان کی سلامتی، خودمختاری اور استحکام کے لیے پوری قوم متحد ہے، ملک دشمن عناصر اپنے مذموم عزائم میں کبھی کامیاب نہیں ہوسکتے۔ انہوں نے کہا کہ قومی یکجہتی ہی پاکستان کی اصل طاقت ہے اور نوجوان نسل میں حب الوطنی کے جذبے کو فروغ دینا وقت کی اہم ضرورت ہے۔میر اصغر خان پہنور اور دیگر مقررین نے کہا کہ پاکستان کے عوام اپنی افواج اور قومی اداروں پر مکمل اعتماد رکھتے ہیں۔ انہوں نے کہا کہ “معرکہ حق ریلی” کا مقصد عوام میں اتحاد و اتفاق، قومی شعور اور ملکی دفاع کے حوالے سے آگاہی پیدا کرنا ہے۔ریلی کے دوران سیکیورٹی کے سخت انتظامات کیے گئے جبکہ مختلف شاہراہوں پر ٹریفک کی روانی برقرار رکھنے کے لیے پولیس اہلکار تعینات رہے۔ اختتامی اجتماع میں ملک کی سلامتی، استحکام اور ترقی کے لیے خصوصی دعائیں بھی کی گئیں۔