نواب شاہ (رپورٹ: نفیس آرائیں) ڈپٹی کمشنر شہید بینظیرآباد عبدالصمد نظامانی کی زیرِ صدارت پری مون سون فلڈ 2026 کے سلسلے میں ایک اہم اجلاس ڈپٹی کمشنر آفس میں منعقد ہوا، جس میں مون سون بارشوں اور ممکنہ سیلابی صورتحال سے نمٹنے کے لیے پیشگی انتظامات، سیم نالوں، برساتی گزرگاہوں اور ڈرینیج سسٹم کی صفائی، نکاسیٔ آب، طبی سہولیات، ریسکیو اقدامات اور ہنگامی حالات سے نمٹنے کے جامع لائحۂ عمل کا تفصیلی جائزہ لیا گیا۔
اجلاس سے خطاب کرتے ہوئے ڈپٹی کمشنر عبدالصمد نظامانی نے متعلقہ محکموں کے افسران کو ہدایت کی کہ مون سون بارشوں سے قبل تمام برساتی نالوں، سیم نالوں اور ڈرینیج چینلز کی صفائی کا عمل ہنگامی بنیادوں پر مکمل کیا جائے تاکہ شہری و دیہی علاقوں میں بارش کے پانی کی بروقت نکاسی کو یقینی بنایا جا سکے۔ انہوں نے زور دیا کہ کسی بھی ممکنہ ہنگامی صورتحال سے مؤثر انداز میں نمٹنے کے لیے تمام ادارے اپنی مشینری، افرادی قوت اور دستیاب وسائل کو ہمہ وقت الرٹ رکھیں۔
ڈپٹی کمشنر نے محکمۂ صحت اور ریسکیو 1122 کے افسران کو ہدایت جاری کرتے ہوئے کہا کہ متوقع بارشوں اور ممکنہ سیلابی صورتحال کے دوران اسپتالوں میں ادویات، طبی عملے، ایمرجنسی وارڈز اور ایمبولینس سروس کی مکمل دستیابی یقینی بنائی جائے، جبکہ لائیو اسٹاک سمیت دیگر متعلقہ ادارے بھی حفاظتی و احتیاطی اقدامات بروقت مکمل کریں۔ انہوں نے ایل بی او ڈی حکام کو سیم نالوں کی صفائی کے عمل میں مزید تیزی لانے کی بھی ہدایت دی۔
اجلاس میں متعلقہ افسران نے پری مون سون انتظامات، نکاسیٔ آب کے جاری منصوبوں اور حفاظتی اقدامات کے حوالے سے بریفنگ دیتے ہوئے آگاہ کیا کہ مختلف علاقوں میں صفائی اور نکاسیٔ آب کے کام تیزی سے جاری ہیں، جنہیں جلد مکمل کر لیا جائے گا۔
اجلاس میں پاک فوج کے افسر شہیب، ایم ایس پی ایم سی اسپتال ڈاکٹر یار علی جمالی، ڈی ایس پی پولیس عبدالحمید جلبانی، ڈپٹی ڈائریکر لائیو اسٹاک ڈاکٹر اعجاز حسین لغاری، ریسکیو انچارج ذیشان زرداری، اسسٹنٹ کمشنر سکرنڈ رمیز راجہ، محکمۂ صحت، ایریگیشن، ایل بی او ڈی، روہڑی کینال، ڈرینیج اور دیگر متعلقہ محکموں کے افسران نے شرکت کی۔